Kreu i Komisionit Qendror të Zgjedhjeve, Ilirjan Celibashi është paraqitur në Komisionin për Çështjet Ligjore ku është përgjigjur lidhur me veprimtarinë e kryer nga KQZ gjatë këtij viti zgjedhor.
Në komision ishte i pranishëm dhe deputeti demokrat Oerd Bylykbashi, i cili vlerësoi rolin e futjes së teknologjisë në zgjedhje duke thënë se kjo e kishte ndihmuar procesin, por nga ana tjetër kritikoi mungesën e veprimtarisë së KQZ gjatë periudhës kur nuk ka zgjedhje.
“Pa u zgjatur shumë, unë gjykoj se duke e parë me shumë interes mbështetjen e KQZ, është krijuar ideja se KQZ është pa punë deri në momentin e zgjedhjeve të reja. Ky institucion duhet të jetë gati dhe në gatishmëri të plotë me kapacitetet që ka në dispozicion dhe të mos jetë gjithmonë në situata urgjence. Futja e teknologjive në votim, provoi të ishte një sukses. E kemi të qartë tashmë se kutitë nuk u mbushën masivisht”, tha Bylykbashi.
Ndër të tjera, ai se ky institucion duhet të funksionojë gjithmonë dhe të fillojë që tani përgatitjet për zgjedhjet e ardhshme.
“Pra identifikimi biometrik ka bërë një punë të kënaqshme dhe unë gjykoj se këto pajisje duhet të ruhen në parametra optimale. Nuk mund t’i blejmë sa herë ka zgjedhje, janë planifikuar të përdoren për një numër zgjedhjesh. Duhet të fillojë përgatitjet tani, ta njohë tani terrenin. Të ngrihen struktura nga KQZ në mënyrë që mos të lihen nën kontrollin e bashkive dhe më pas të ndryshohen ambientet e votimit në ditën e fundit para zgjedhjeve. Pra KQZ duhet ta ketë të qartë situatën dhe ta përgatisë më së miri”, shtoi ai.
Disa ditë më parë, Celibashi njoftoi se institucioni që ai drejton është gati për zhvillimin e zgjedhjeve vendore të pjesshme, nisur kjo nga vendimi i Gjykatës Kushtetuese për rrëzimin e padisë së “30 qershorit”.
Discussion about this post