Në çdo protestë kanë qenë pjesëmarrës edhe persona me aftësi të kufizuar. Ndërkohë ditën e sotme Saimir Farici, përfaqësuesi i shoqatës “Shpresë për të verbrit”, është shprehur shumë i revoltuar në protestë. Ai e cilësoi si qesharake ndihmën prej 30 mijë lekësh të dhënë nga qeveria për kategoritë në nevojë dhe pensionistët, duke thënë se këto janë plotë arsye që duhet të na nxjerrin në protestë. Farici u shpreh se aktualisht të verbrit marrin 120 mijë lekë përkrahje sociale nga shteti, duke e bërë jetesën të pamundur me rritjen e çmimeve.
“Unë Saimir Farici jam president i shoqatës “Shpresë për të verbrit”, jam këtu duke protestuar për të gjithë personat me aftësi të kufizuara të cilët në këto ditë të vështira, përveç sëmundjes edhe problemit me shëndetin ju shtohet ngarkesa ekonomike nga rritja e çmimeve. I drejtohem kryeministrit, tregohu i përgjegjshëm dhe ktheji sytë nga populli. Jemi 6 ditë në protestë që kërkohet ulja e çmimeve dhe jam shumë i shqetësuar kur ti si kryeministër ke dhënë 30 mijë lekë për personat me aftësi të kufizuar pensionistët dhe familjet me ndihmë ekonomike.
Çfarë t’i bëjnë këto lekë këta persona, kur të verbrit sot marrin një pagesë prej 120 mijë lekësh. Një pagesë që është tepër qesharake. Në ’96-ën kur u miratua statusi i të verbërve, pagesa e dhënë ishte 70% e pagës minimale, sot është 42%. Çfarë është kjo jetë, si mund të jetojmë në këtë mënyrë“, tha ai. Ai tha se të gjithë pa përjashtim po preken nga rritja e çmimeve, prandaj protestat nuk duhet të ndalen.
Discussion about this post