Caktohet data, ja kur mbahen zgjedhjet e parakohshme në Gjermani

Gjermania do të shkojë në zgjedhje më 23 shkurt, pas rënies së koalicionit të qendrës së majtë të kancelarit Olaf Scholz.

Udhëheqësit parlamentarë nga partitë më të mëdha politike të vendit – social-demokratët (SPD) e Scholzit dhe Unioni Kristian-demokrat konservator (CDU) – arritën një marrëveshje të martën, thanë burime nga të dyja palët për “DPA” – agjencinë publike gjermane të lajmeve.

Vendimi vjen pas një jave grindjeje në Berlin pasi Scholz shkarkoi ministrin e tij të Financave, Christian Lindner nga Demokratët e Lirë (FDP) pro biznesit, duke e bërë partinë të tërhiqet nga koalicioni trepalësh.

Largimi i FDP-së e la Scholzin pa një shumicë në Bundestag.

Për mbajtjen e zgjedhjeve, Scholz pritet të thërrasë votëbesimin në Bundestag më 16 dhjetor.