Presidenti Ilir Meta i është përgjigjur deklaratave të ish-kryeministrit Sali Berisha për dekretimin e Kreut të ri të Shtetit, Bajram Begaj nga Stambolli, duke e liruar nga posti i shefit të Shtabit të Përgjithshëm të Forcave të Armatosura.
Meta në një deklaratë shprehet se vendimi i tij është në koherencë me Kushtetutën.
“Se çfarë thotë zoti Berisha është e drejtë e tij. Nëse ka ndonjë njeri në këtë tokë më koherent me kushtetutën. Më falni për mungesën e modestisë, por ai është vetëm Ilir Meta. Ku është e shprehur kjo që firmoset jashtë territorit? Presidenti përgjigjet për zbatimin e kushtetutës së Shqipërisë”, tha Meta.
Sjellim në kujtesë që ish-kryeministri Sali Berisha ironizoi firmosjen e dekretit nga ana e Metës “ si Ali Pasha, trupin në Janinë e kokën në Stamboll”.
Meta sqaron më tej edhe procedurën e ndjekur. “Dekreti ka ardhur në mënyrë elektronike nga Tirana në Stamboll. Pasi u shqyrtua nga unë dhe pasi e lexova, e firmosa publikisht dhe u dërgua elektronikisht ne Tiranë. Çdo veprim i imi ka qenë në përputhje me Kushtetuten dhe në përputhje me ligjin. Në planin kushtetues zero problem, ne planin ligjor zero problem, ne planin moral zero problem”, tha Meta.
Discussion about this post