Çekia nuk do të marrë pjesë në Eurovision 2027, pasi televizioni publik “Česká televize” ka vendosur të mos dërgojë përfaqësues në konkursin që do të zhvillohet në Bullgari. Vendimi lidhet me shkurtimet dhe ristrukturimet buxhetore që po përballon transmetuesi publik.
“Česká televize” e konfirmoi vendimin përmes një deklarate, duke sqaruar se Eurovisioni është një projekt me kërkesa të konsiderueshme në aspektin programor, prodhues dhe organizativ. Për shkak të ndryshimeve aktuale në buxhet, televizioni ka vendosur të mos marrë pjesë në edicionin e vitit të ardhshëm.
“Në vitin 2027 nuk do ta shohim flamurin çek në skenë”, deklaroi televizioni publik, duke lënë të hapur mundësinë e rikthimit në një edicion të ardhshëm. Transmetuesi theksoi se pjesëmarrja vlerësohet veçmas për çdo vit dhe se aktualisht nuk mund të përcaktojë se kur do t’i rikthehet konkursit.
Pas vendimit qëndron një situatë më e gjerë financiare. Televizioni publik çek po përgatit masa kursimi, përfshirë anulimin e disa programeve, kufizimin e investimeve dhe shkurtimet e vendeve të punës. Këto zhvillime lidhen edhe me pasigurinë rreth mënyrës së ardhshme të financimit të medias publike në vend.
Vendimi i Pragës vjen në një moment kur Eurovision 2027 po përballet edhe me debate të tjera rreth pjesëmarrjes së disa vendeve. Irlanda ka konfirmuar bojkotin e edicionit të ardhshëm, ndërsa Spanja po shqyrton gjithashtu qëndrimin e saj për shkak të debatit mbi pjesëmarrjen e Izraelit. Megjithatë, Çekia nuk e ka lidhur tërheqjen e saj me këtë çështje, por vetëm me situatën financiare të televizionit publik.
Në edicionin e vitit 2026, Cehia u përfaqësua nga Daniel Žižka, i cili u rendit në vendin e 16-të me këngën “Crossroads”. Eurovision 2027 do të mbahet në Burgas të Bullgarisë, pas fitores së këngëtares bullgare Dara në edicionin e këtij viti.
Discussion about this post