Kreu i Komisionit Qendror të Zgjedhjeve, Ilirjan Celibashi, u ka bërë thirrje grupeve të numërimit dhe KZAZ-ve që të intensifikojnë punën dhe të përmbyllin procesin e numërimit të votave brenda afatit ligjor, i cili përfundon në mesnatën e kësaj të enjteje.
Në një deklaratë për shtyp, Celibashi theksoi gjithashtu nevojën që vëzhguesit dhe përfaqësuesit e partive politike të shmangin çdo lloj presioni apo ndërhyrjeje ndaj numëruesve, pasi kjo sjell vonesa të panevojshme në proces.
Ai nënvizoi se përgjegjësia për çdo mosfinalizim të procesit brenda afatit i takon drejtpërdrejt partive politike. Komisioni Qendror i Zgjedhjeve, shtoi ai, ka marrë dhe po merr të gjitha masat e nevojshme për të garantuar një mbarëvajtje të procesit në përputhje me ligjin.
Në deklaratë, thuhet:
Komisioni Qendror i Zgjedhjeve u bën thirrje partive politike që kanë anëtarë në KZAZ dhe në GNV të marrin përgjegjësinë që u takon për të nxitur numëruesit dhe komisionerët në KZAZ-të ku ende nuk ka përfunduar procesi i numërimit të votave, që ky proces të përfundojë brenda afatit ligjor, konkretisht deri në orën 24:00 të ditës së sotme.
Nuk ekziston asnjë arsye që ky proces të mos përmbyllet brenda këtij afati.
Duke njohur dhe respektuar të drejtën e kandidatëve për deputet për të vëzhguar dhe mbikëqyrur procesin e numërimit, i ftojmë ata të shmangin çdo përfshirje në komunikime të panevojshme apo ushtrim presioni ndaj numëruesve dhe komisionerëve.
Përgjegjësia për mosfinalizimin në kohë të procesit i takon plotësisht partive politike. Komisioni Qendror i Zgjedhjeve ka ndërmarrë dhe po ndërmerr të gjitha përpjekjet për të garantuar mbarëvajtjen dhe përfundimin e procesit.
Nëse situata nuk do të ndryshojë brenda afatit të përcaktuar, me keqardhje njoftojmë se të gjithë personat përgjegjës do të përballen me sanksione ligjore.
Discussion about this post