Zbulohet një tjetër Call Center në Bërzhitë, sekuestrohen kompjutera e celularë

Një tjetër qendër e dyshuar mashtrimi me Call-Center është zbuluar në Tiranë ditën e sotme.

Burime zyrtare të policisë bënë me dije se lokalizoi dhe goditi një ambient ku kryhej mashtrimi i qytetarëve, kryesisht atyre të huaj, me qëllime përfitimi, duke bërë manipulime nëpërmjet bursës.

“U krye kontroll në një ambient në pronësi/administrim të shtetasit F. K., në fshatin Bërzhitë, ku në bazë të informacioneve të siguruara në rrugë policore, kryhej mashtrim kompjuterik në formë call centeri”, tha policia.

Nga ambienti u sekuestruan njësi kompjuterike dhe celularë, që do t’i nënshtrohen ekzaminimeve, për të përcaktuar qëllimin e përdorimit të tyre.

Hetuesit zbardhën edhe taktikën e përdorur nga administratori për t’i shpëtuar kontrolleve dhe zbulimit.

“Subjekti është i regjistruar me aktivitet në fushën e turizmit mjekësor, dhe për këtë, shtetasi F. K. ka paraqitur dokumentet. Hetimet vijojnë për të dokumentuar rrethanat e rastit”, sqaroi policia.

Materialet procedurale iu referuan Prokurorisë së Tiranës, për veprime të mëtejshme.

Disa ditë më parë u goditën 3 qendra Call-Center në Tiranë, duke arrestuar 7 persona dhe 2 të tjerë u shpallën në kërkim, pasi akuzoheshin për mashtrimin me vlera deri në 5 mln euro të qytetarëve të huaj. Hetimet kishin nisur në Austri, aty ku ishte kryer veprimtaria kryesore e mashtrimit dhe operacioni u bë bashkë me SPAK dhe Policinë e Shtetit.