Ceremonia në nder të Clinton, Rama nuk ftoi as Ilir Metën

Ish-Presidenti Bill Clinton u nderua me medaljen “Ylli i Mirënjohjes” në një ceremoni të organizuar nga Kryeministri Edi Rama.

Rama i akordoi ish-Presidentit amerikan të njëjtën medalje që më parë ia ka dhënë atletes Luiza Gega, ish-ambasadores amerikane Yuri Kim, ish-kancelares Angela Merkel, apo të tjerë zyrtarëve që ai ka menduar se e meritojnë.

Ceremonia u zhvillua në bulevardin “Dëshmorët e Kombit”, ndërsa u kthye në një event pothuajse tërësisht privat të Kryeministrit, që ishte kujdesur për të ftuarit. Ajo që ra në sy ishte mungesa e ish-Presidentit Ilir Meta, ndërkohë që të ftuar ishin ish-Presidentët Rexhep Mejdani, Alfred Moisiu dhe Bamir Topi.

E ndërsa për ish-Presidentin dhe ish-Kryeministrin Sali Berisha, Rama mund të justifikohet me “non grata-n”, në rastin e Ilir Metës, ish-Kryeministër, ish-Kryetar i Kuvendit dhe ish-President, duket se Kreu i Qeverisë, thjesht ka kryer një akt të vockël “hakmarrjeje”.

Pavarësisht raporteve që Rama mund të ketë sot me Metën, ky i fundit ka të njëjtin status me atë t ëish-Presidentëve që Kryeministri apo stafi i tij ishin kujdesur jo vetëm ti ftonin, por ti caktonin edhe vendin ku do të uleshin.