Cërriku kundër hartës së re të Ramës: Këshilli Bashkiak kundërshton bashkimin me Elbasanin

Gjatë ditës së sotme u zhvillua mbledhja e Këshillit Bashkiak të Cërrikut, ku në fokus ishte reforma territoriale.

Këshilltarët kundërshtuan propozimin për bashkimin e Cërrikut me Bashkinë e Elbasanit, duke argumentuar se një ndryshim i tillë do të largonte shërbimet nga qytetarët dhe do të nxiste më tej shpopullimin e zonës.

Mbledhja u ndoq edhe nga deputetët e opozitës, Blendi Himçi dhe Klodiana Çapja.

Himçi i kërkoi kryebashkiakut Florenc Doka të shprehë qëndrimin e tij për procesin, ndërsa disa këshilltarë i konsideruan dëgjesat publike të vonuara dhe formale.

Si një alternativë u propozua edhe zhvillimi i një referendumi me komunitetin.

Kryebashkiaku Florenc Doka deklaroi se nuk dëshiron të marrë një qëndrim përfundimtar për të ardhmen e Bashkisë së Cërrikut pa përfunduar më parë dëgjesat publike me qytetarët.

Në përfundim, Këshilli Bashkiak votoi me shumicë pro zhvillimit të dëgjesave publike me komunitetin.

Sipas draftit paraprak të reformës territoriale, Cërriku dhe Belshi parashikohet t’i bashkohen Bashkisë së Elbasanit. Propozimi është kundërshtuar nga një pjesë e banorëve, të cilët kanë shprehur qëndrimin e tyre edhe përmes protestave.