Çështja “Butrinti”, Tare-Gonxhes: Hidhe poshtë marrëveshjen me AADF si poshtëruese

Studiuesi i njohur Auron Tare i është përgjigjur ministrit të Kulturës, Blendi Goxhnja pas reagimit të këtij të fundit për çështjen e Butrintit.

Ministri i Ekonomisë, Inovacionit dhe Kulturës, Blendi Gonxhja, në reagimin e tij thekson se do të ketë në vëmendje maksimale mirëadministrimin e procesit sfidues të ndryshimit të modelit të menaxhimit të kësaj pasurie.

Reagimi i Gonxhes vjen pas qëndrimit të UNESCO, e cila rekomandon që Ministria e Kulturës të ketë autoritet mbi të gjithë këtë pasuri botërore, duke theksuar se vetëm themelimi i Fondacionit nuk mund të përmbushë rekomandimet për menaxhimin e integruar të këtij parku.

“Në cilësinë e Ministrit përgjegjës për trashëgiminë kulturore dhe njëkohësisht si Kryetar i Bordit Drejtues të Fondacionit për Menaxhimin e Butrintit (për shkak të funksionit), siguroj opinionin publik për angazhimin dhe vëmendjen maksimale për mirëadministrimin e procesit sfidues të ndryshimit të modelit të menaxhimit të pasurisë kulturore universale të Parkut Kombëtar të Butrintit, në zbatim të plotë të standardeve ndërkombëtare dhe të kuadrit ligjor shqiptar në fuqi”, shprehet Gonxhe.

Por, duke iu përgjigjur në rrjetet sociale, Tare ngre disa pikëpyetje duke u përqendruar më së shumti tek raporti i UNESCO-s dhe nëse do të ndërmerreshin masa për ata që e fshehën këtë raport.

“I nderuar Z Ministër

E para keni detyrimin ligjor dhe moral për të sqaruar opinionin publik për raportin e Unesco/Icomos.

Çfare permban dhe përse u fsheh nga Institucioni i Trashëgimise Kombëtare. Çfare masash do merren për ata që fshehën këtë raport?

E dyta Z. Ministër, cila është ekspertiza më e mirë boterore që AADF paska thithur?

Kur Unesco/Icomos të ka hedhur poshte cilësinë e përthithur.

E treta mblidh ekspertët shqiptare për të folur me ta dhe për të dëgjuar procesin ashtu si dikur kur ishe në Ministrine e Kulturës.

E katërta, hidh poshtë Marrëveshjen me AADF për transferimin e Butrintit si një Marrveshje poshtëruese për punen e të gjithë atyre që kanë kontribuar në Butrint, por edhe si një e drejte sovrane e një vendi, i cili nuk i jep apo shet pasurinë e saj kulturore për grupe me interesa te dyshimta. Ti e di mirë që Parku nuk u krijua nga Londra, por nga shqiptarët që e donin këtë vend ku një nder ta ishe edhe ti”, shkruan Tare.