Çështja e emigrantëve, Orban kundër marrëveshjes: BE po shpërdoron pushtetin

“Ata duan që t’i zhvendosin me dhunë emigrantët në Hungari”.

Kjo është akuza e hedhur në Facebook nga kryeministri hungarez, Viktor Orban, pas marrëveshjes në Këshillin e BE-së për imigracionin (e kundërshtuar edhe nga Polonia).

Sipas kryeministrit hungarez “është e papranueshme” që BE-ja dëshiron të “përdorë dhunën për ta transformuar Hungarinë në një vend emigrantësh”.

Ndërkohë, ministrat e Brendshëm të 27 vendeve të BE-së, kanë miratuar një tekst kompromisi me të cilin Italia shënon një fitore të rëndësishme, falë serisë së gjatë të ndryshimeve që kanë kaluar që nga versioni fillestar.

Nga kuota vjetore e migrantëve për t’u ndarë shtet pas shteti, tek kontributi financiar për ata që nuk marrin pjesë në zhvendosje, tek identifikimi i vendeve të treta në të cilat do të dërgohen migrantët e dëbuar, ka shumë masa që vendosin një mekanizëm të “solidaritetit të detyrueshëm”.