Çështjet e mbetura pezull mes dy vendeve po ndikon negativisht në marrëdhëniet diplomatike mes Shqipërisë dhe Greqisë, të cilat janë kthyer në vëmendje edhe njëherë pas takimit të ministres Olta Xhaçka dhe homologut të saj grek Nikos Dendias. Ish-diplomati Pëllumb Xhufi, njëherësh edhe historian, shprehet se marrëdhëniet mes dy shteteve kanë mbetur në vend për shkak të mungesës së zgjidhjes së këtyre problemeve. Akademiku Xhufi vuri theksin mbi diskutimet e ligjit të luftës dhe tek çështja çame.
“Pas kësaj do të ketë një angazhim më të madh nga të dy palët për të arritur në zgjidhjen e këtyre problemeve që nuk janë pa ndikim në mbetjen pezull të ecjeve përpara të marrëdhënieve shqiptaro-greke. Janë shtruar dhe po diskutohen prej vitesh. Madje prej dekadash, por deri tani akoma nuk kemi një zgjidhje” – tha Xhufi.
Ndërsa sa i takon përballjes në Hagë për kufirin detar, ai ka rezervat e tij ku thotë se flasim për kufirin detar në një kohë që nuk ekziston ende një marrëveshje për kufirin tokësor midis Greqisë dhe Shqipërisë.
“Ne flasim për kufirin detar në një kohë që nuk ekziston ende një marrëveshje për kufirin tokësor midis Greqisë dhe Shqipërisë sepse pala greke nuk ka pranuar deri tani të nënshkruajë dy marrëveshje kuadër të cilat legalizojnë njohjen reciproke të kufijve” – u shpreh Xhufi.
Megjithëse janë çështje të një rëndësie kombëtare nuk dihet se kur ato do të marrin zgjidhje dhe sa të frytshme do të jenë ato.
Discussion about this post