Saida Dollani është gjyqtarja që do të shqyrtojë rolin që ka pasur ish-ministri i Mbrojtjes, Fatmir Mediu në tragjedinë e Gërdecit, në Apelin e Posaçëm. Mësohet se, çështja do të shqyrtohet nga kjo gjyqtare e vetme.
SPAK kërkon revokimin e vendimit të Gjykatës së Lartë dhe rinisjen e gjykimit për ish-ministrin e Mbrojtjes për akuzën e shpërdorimit të detyrës në lidhje me tragjedinë e Gërdecit ku nga shpërthimi i punishtes së demontimit të armëve mbetën 26 të vrarë dhe qindra të plagosur. Ndërkohë çështja do të shqyrtohet në dhomë këshillimi.
Gjykata e Posaçme kundër Krimit dhe Korrupsionit vendosi më herët më 27 korrik që të rrëzojë kërkesën e SPAK për rihapjen e hetimeve për Fatmir Mediun.
Menjëherë pas këtij vendimi, SPAK ankimoi vendimin në Apelin e GJKKO, ndërsa argumentoi se rrëzimi i kërkesës është i pa bazuar në ligj. Shpërthimi në Gërdec ndodhi më 15 mars, në një fabrikë për demontimin e armëve, ku si pasojë e shpërthimit humbën jetën 26 persona, ndërsa u plagosën qindra të tjerë.
