Me datë 11 tetor prokuroria e Gjirokastrës, pas tre vitesh, kishte marrë miratimin mbi përfundimin e hetimeve për vrasjen e Kostandin Katsifas në fshatin Bularat, duke dërguar një kërkesë në gjykatë për të kërkuar pushimin e procedimit penal. Por përmes një njoftimi Gjykata bëri me dije se vendosi kthimin e çështjes duke urdhëruar kryerjen e disa veprimeve të tjera hetimore sipas parashikimeve ligjore.
Pra, nga njëra anë, prokurori Çafka qysh prej muajit Maj 2021, pretendon se dosja duhet të mbyllet pasi kemi të bëjmë me një vetëvrasje të viktimës dhe jo vrasjen e Katsifas nga forcat policore RENEA. Ndërsa nga ana tjetër, kemi gjyqtaren e Gjirokastrës, Suela Dashi, që ndryshe nga çfarë ka dalë në përfundim prokurori, nuk pranon të pushojë dosjen hetimore me Nr.824, duke mos gjetur kështu një gjuhë të përbashkët për të mbyllur këtë dosje.
Mësohet se gjyqtarja Dashi, shprehet se në dosje evidentohet mungesa e paraqitjes skematike, sistematike dhe kronologjike të veprimeve të kryera nga viktima. Njëherësh ka mungesë të arsyeve shkencore për të cilat nuk është e mundur të përcaktohet me saktësi kalibri dhe modeli i armës, nga e cila ka gjetur vdekjen viktima. Gjithashtu, ka mungesë të konkluzioneve të qarta në aktet e ekspertimit të urdhëruara nga prokurori.
Nisur nga kjo situatë gjyqtarja, vendosi të kthejë mbrapsht hetimet, duke i lënë 3 muaj kohë prokurorit Çafka që të përmbushë detyrat hetimore. Në këto 3 muaj, prokurori Çafka duhet të kryente 4 detyra që janë pasqyrimi skematik i vendit të ngjarjes dhe evidentimi i provave materiale në vendngjarje, kryerja e ekspertimeve shtesë në raport me aktet e ekspertimit të ndodhura në dosjen hetimore, realizimi i eksperimentit hetimor me qëllim ndërtimin e vendngjarjes.
Si dhe detyra e katërt ishte që ai tu njoftojë palëve të interesuara aktet e ekspertimit. Pranë vendit ku është gjendur trupi i pajetë i Katsifas, policia ka sekuestruar një armë automatike me dylbi dhe rreth 30 gëzhoja.
Gjyqtarja Dashi, shprehet se ekspertët balistikë nuk kanë dhënë një arsye shkencore ku të përcaktohet me saktësi modeli i armës, që ka sjellë vdekjen e Katsifas. Por teksa ky afat ka përfunduar në fund të muajit Gusht 2021, dhe prokuroria nuk ka mundur ti përmbushë detyrat e lëna nga gjykata, është sërish prokuroria që i drejtohet gjykatës me një kërkesë të dytë. Në muajin shtator 2021, prokurori Julian Çafka kërkoi në gjykatë zgjatjen me dy muaj të afateve hetimore për dosjen e Katsifas, me argumentin e përmbushjes së 4 detyrave të lëna nga gjykata.
Kjo kërkesë e bërë nga prokurori, është miratuar nga gjykata në datën 30 shtator 2021, duke shtyrë afatin hetimor, tej çdo parashikimi të mundshëm, dhe caktuar si afat të fundit të zhvillimit të seancës paraprake, datën 13 dhjetor 2021 në orën 11:00.
Kujtojmë se Konstandinos Katsifas, u vra më 28 tetor 2018 gjatë një shkëmbimi zjarresh me forcat RENEA. Ditën e varrimit, në Bularat, erdhën rreth 1500 nacionalistë grekë që e përcollën 35-vjeçarin drejt banesës së fundit të veshur me rroba ushtarake. Vrasja e tij nga forcat RENEA shkaktoi shumë tensione mes dy vendeve fqinje.
