Ish-Kryeministri Sali Berisha, në konferencën e përjavshme për mediat, tha se opozita nuk do të heqë dorë nga kërkesa e saj për komision hetimor lidhur me aferën McGonigal. Berisha tha se opozita do t’i drejtohet Gjykatës Kushtetuese lidhur me këtë kërkesë, e refuzuar nga mazhoranca në Parlament.
Gjithashtu Berisha tha se opozita do të paraqesë çdo provë e fakt para shqiptarëve lidhur me përfshirjen e Edi Ramës në këtë aferë, ndërsa shtoi se një dosje do të depozitohet në SPAK me çdo provë dhe fakt që do të ketë opozita.
Gjithashtu Berisha shprehu gadishmërinë për të ndihmuar edhe drejtësinë amerikane me çdo provë e fakt për ti shkuar deri në fund hetimit të kësaj afere.
Sipas Berishës, pranimi nga McGonigal i 6 akuzave të lidhura direkt me Edi Ramën dhe ndihmësit e tij, kanë tronditur dhe çorientuar në shkallë ekstreme këtë të fundit.
“Edi Rama është bashkëfajtor në të gjithë dosjen shqiptare me McGonigal.
Por, ka dhe një problematike tjetër të madhe se në rast se McGonigal në deklaratën e tij, ka pranuar6 akuza të një pike të aktpadisë dhe e ka cituar personalisht 11 herë Edi Ramën, pra e ka lëshuar në rënie të lirë, për t’i dëshmuar gjykatëses se ky është po aq fajtor sa McGonigal, marrëveshja, të cilën ju ia paraqitët publikut, ka dy pika të tmerrshme, në të cilat mediat nuk u ndalën.
Njëra prej tyre thotë se gjykatësja nuk ka asnjë detyrim të pranojë këtë marrëveshje dhe të mos urdhërojë hetime të tjera dhe të mos vlerësojë çështje të tjera në gjykimin e McGonigal.
Por e vërteta është se e njëjta pikë ekziston për prokurorinë. Prokuroria, megjithëse ka firmosur marrëveshjen, nuk ka asnjë kufizim për të hetuar rreth këtyre pikave që ky ka pranuar, gjer në shkurt të vitit të ardhshëm.
Akuza e vetme e pikës së aktpadisë për Edi Ramën, që nuk reflektohet në deklaratën e McGonigal, është gjobëvënia. Ajo ishte aspekti më i shëmtuar i veprimtarisë si grup kriminal i strukturuar.
Pra, gjobëvënia, lufta kundër opozitës, ndryshimi i licencave janë tre momentet klasike, në të cilat Edi Rama, McGonigal, Agron Neza, Dorian Duçka, Damian Gjiknuri, etj, rreshtohen, grupohen si grup i strukturuar kriminal.
Për të gjitha këto, ne do përpiqemi të paraqesim çdo fakt, dokument para drejtësisë amerikane, por edhe drejtësisë shqiptare”, tha Berisha.
Discussion about this post