Përfaqësuesi ligjor i Partisë Demokratike, Indrit Sefa iu përgjigj sot kryetarit të PD-së, Sali Berisha në lidhje me pretendimet e tij mbi pushimin e çështjes nga Gjykata e Apelit, pas tërheqjes së grupit parlamentar të PD-së nga ankimimi për bashkimin e dy statuteve të PD-së.
Në një deklaratë për mediet, Berisha tha se, Alibeaj me tërheqjen e tij pranoi Kuvendin e 11 dhjetorit.
Nga ana e tij, përfaqësuesi ligjor i PD-së, Sefa, pjesë e “grupit Alibeaj”, theksoi se, “është gjykata ajo që vlerëson ligjshmërinë Kuvendit të 11 dhjetorit”.
Në një postim në rrjetet sociale, Sefa u shpreh se, “në cilësinë e përfaqësuesit të Partisë Demokratike kam ndjekur të gjitha zhvillimet juridike në Gjykatën e Apelit duke kërkuar që kjo e fundit të caktojë datën për gjykimin e vendimit të gjyqtarit Zhukri. Megjithë, kërkesat tona institucionale, kjo gjykatë ende nuk ka caktuar një datë për këtë gjykim”.
Reagimi
“Nisur nga fakti që gjykimi lidhur me Kuvendin e 18 dhjetorit mund të përdorej si argument ligjor për mos caktimin e datës së gjykimit të Apelit për vendimin e gjyqtarit Zhukrit, për shkak të lidhjes ligjore ndërmjet këtyre dy çështjeve, me qëllim heqjen e çdo pengese për gjykimin e vendimit të gjyqtarit Zhukri, zgjodhëm që të heqim dorë nga gjykimi për regjistrimin e ndryshimeve statutore të Kuvendit të 18 dhjetorit”, theksoi ai.
“Kërkesa për regjistrimin e këtyre ndryshimeve do të depozitohet në Gjykatën e Tiranë brenda kësaj jave. Ndryshe nga sa pretendon Sali Berisha, deri më sot, këta së bashku nuk kanë kërkuar në asnjë rast që Gjykata e Apelit Tiranë të shprehet lidhur me vendimin e gjyqtarit Zhukri dhe për pasojë zgjidhjen e ngërçit ligjor të krijuar lidhur me legjitimitetin e Kuvendit të 11 dhjetorit. Nuk ka asnjë kërkesë të tyre drejtuar kësaj gjykate për caktimin e seancës përveç retorikes politike për kapjen e saj nga Rama”, u shpreh Sefa.
Ai theksoi se, “i vetmi person që nuk ka interes që gjykata të shprehet lidhur me ligjshmërinë e vendimit të Gjykatës është pikërisht Sali Berisha. Duke u bazuar në pretendimet e Rithemelimit i kërkojmë atyre që bashkërisht të kërkojmë që Gjykata e Apelit të caktojë datën e seancës dhe të zgjidhim ngërçin ligjor për demokratët dhe për Partinë Demokratike”.
“Le t’i kërkojmë bashkërisht Gjykatës së Apelit caktimin e seancës dhe t’ia nënshtrojmë ligjshmërinë e Kuvendit të 11 dhjetorit gjykimit të saj. Vendimi jo vetëm do të tregojë se si qëndron e drejta, por edhe do t’i japë fund njëherë e mirë përdorimit të emrit dhe simboleve të Partisë Demokratike në mënyrë të paligjshme nga Rithemelimi”, shkroi Sefa,
Discussion about this post