Mazhoranca socialiste vijon të mbrojë deputeten dhe ish-ministren e PS Olta Xhaçka edhe pas opinionit të Komisionit të Venecias.
Në një interpretim të “çështjes Xhaçka”, të depozituar në Venecia nga Kuvendi me iniciativën e PS, komisioni shprehet se të gjitha autoritetet e kanë detyrim të zbatojnë në mënyrë efektive vendimet e Gjykatës Kushtetuese. Sipas Venecias, këto vendime nuk duhet të kushtëzohen me votim apo shumicë parlamentare.
Por, edhe pas këtij konstatimi, Partia Socialiste vijon ta mbrojë deputeten Xhaçka.
E para që e artikuloi këtë qëndrim ishte deputetja socialiste Klotilda Bushka. Në një deklaratë nga Kryesia e Kuvendit, ajo i bëri një rezyme konfliktit të krijuar nga mazhoranca me Kushtuesen pasi po refuzoni të zbatojë vendimin e gjykatës. Më tej, pretendoi se Komisioni i Venecias i ka dhënë të drejtë socialistëve teksa u shpreh se komisioni artikuloi në opinion se “Kuvendi nuk është i detyruar të votojë në një mënyrë të caktuar”.
Në fakt, Komisioni i Venecias shprehet se “Kuvendi nuk është i detyruar të votojë në një mënyrë të caktuar, por mund të votojë vetëm për çështje që bien brenda kompetencave të tij”, pasi saktëson qartë se “kur një vendim i Gjykatës Kushtetuese interpreton Kushtetutën si kufizuese të kompetencave vendimmarrëse të Kuvendit, ky i fundit duhet të miratojë një vendim në përputhje me vendimin e Gjykatës dhe të votojë për çështjen e kufizuar siç është përcaktuar nga Gjykata Kushtetuese, dhe jo për mundësinë e referimit të çështjes sërish në Gjykatë”.
Gjithashtu, Bushka deklaroi se “Venecia konfirmoi qëndrimin e mazhorancës se sipas jurisprudencës së GJK shqiptare, Kuvendi dërgon për shqyrtim në GJK çështjen e papajtueshmërisë së mandatit të një deputeti, vetëm kur konstatohet kur jemi para rastit të pikës 3 të nenit 70 të Kushtetutës, pra kur vetë deputeti përdor pasuri të shtetit dhe përfiton prej tyre, ndërsa rastet e tjera, Kuvendi i shqyrton vetë”.
Në të njëjtën linjë është dhe qëndrimi i kryeparlamentares Elisa Spiropali, e cila shprehet se “Gjykata Kushtetuese ka kërkuar që deputetët të votojnë në një mënyrë të caktuar dhe kjo nga ne është lexuar jo thjesht si ndërhyrje në pavarësinë e Kuvendit, por në radhë të parë si një vendim i pazbatueshëm për shkak të pamundësisë së një rregulli që i imponon deputetit se si të votojë”.
Qëndrimi nga PS pas publikimit të opinionit të Venecias, konfirmon angazhimin e mazhorancës për të vijuar mbrojtjen me këmbëngulje të mandatit të Olta Xhaçkës.
Discussion about this post