Kreu i organizatës ushtarake të Hezbollahut të Libanit u takua me shefin e Xhihadit Islamik Palestinez, Ziyad al-Nakala dhe nënkryetarin e Hamasit, Saleh al-Aruri, sipas mediave libaneze.
Televizioni Al-Manar, në pronësi të Hezbollahut, raportoi se Hassan Nasrallah dhe dy liderët e tjerë vlerësuan hapat e radhës të “rezistencës” që duhet të ndërmarrin për të “arritur fitoren e vërtetë” në Gaza.
Xhihadi Islamik Palestinez është organizata e dytë më e madhe militante në Gaza pas Hamasit.
Ndërkohë, dhuna u përshkallëzua më tej në kufirin Izrael-Liban të martën, duke bërë që shumë fshatarë libanezë të largoheshin nga shtëpitë e tyre pasi ushtria izraelite duket se kishte vendosur të zgjeronte bombardimet e saj me artileri, sipas burimeve të Agjencisë Gjermane.
Anëtarët e krahut ushtarak të lëvizjes shiite Hezbollah të Libanit, e cila është afër Iranit dhe konsiderohet aleate e lëvizjes islamike palestineze Hamas, kryen të paktën tre sulme kundër pozicioneve izraelite pranë kufirit.
Si përgjigje, ushtria izraelite bombardoi një grup fshatrash kufitare, sipas një burimi të DPA në forcat libaneze të sigurisë.
Predhat ranë brenda fshatit Aita al-Shaab, sipas këtij burimi. Sulme artilerie u raportuan gjithashtu në të paktën katër fshatra të tjerë në Libanin jugor (Kfar Chuba, Markba, Marwahin, Yaroun), shtoi ai.
Discussion about this post