Presidentja e Komisionit Europian nuk i ka shpëtuar pyetjeve të gazetareve lidhur me nisën e “Open Balkan”, pjesë e të cilës është dhe Shqipëria.
Presidentja u shpreh se mirëpret çdo nismë brenda kuadrit të Procesit të Berlinit, ndërsa tha se nuk duhet të fokusohen me imtësi tek fjalët, por procesi duhet të jetë i hapur.
“Unë mendoj që po të shikojmë ecurinë ekonomike si edhe thellimin marrëdhënieve ekonomike, edhe ky treg i përbashkët rajonal, mendoj se procesi i Berlinit është kuadri që po përdoret. Si kuadër që të gjashta vendet e rajonit do të përfitojnë. Çfarë do lloj iniciative që është brenda procesit të Berlinit që është bashkëpunuese mirëpritet prej nesh. Nuk duhet të shikojmë me imtësi fjalët, por kontekstin, të jetë proces i hapur dhe gjithëpërfshirës. Që të ketë një integrim të thellë sepse kjo është pjesë procesit,” deklaroi ajo.
Nga ana tjetër, kryeministri Rama ka siguruar se janë i njëjti proces, ndryshimi i vetëm është se njëri drejtohet nga partnerët ndërkombëtare kurse i dyti nga vetë vendet e rajonit.
“Nuk jam i zhgënjyer, që të zhgënjehesh duhet të gënjehesh. Nuk më ka gënjyer mendja që ky proces është i parashikueshëm. S’kam zhgënjim, e di çfarë ndodh në BE, e di çfarë ndodh në Këshillin Europian, njëherë ka zgjedhje, tjetri zgjedhje, vijnë të tretët nxjerrin diçka. Kjo është mënyra si funksionon. Nuk kam gjë. Është mënyra si është organizuar BE, kërkon durim, kohë, qetësi. Ajo që për ne është e rëndësishme, nuk është se e bëmë apo jo një konferencë me zoom, duhet të bëjmë punën. Për sa kohë kemi mbështetjen e KE, asistencën me të gjithë dijen dhe ekspertizën e BE dhe realizojmë objektivat, e kemi bërë detyrën. Për një gjë që nuk varet nga ne s’kemi arsye të gënjehemi a zhgënjehemi. E them pa ironi, cinizëm. Ky është realiteti, nuk e ndryshojmë dot botën. Mund të ndryshojmë Shqipërinë, BE e ndryshojnë ata që e themeluan dhe që janë brenda tij sot. Nëse duan ta ndryshojnë, për aq sa munden, ne nuk e ndryshojmë dot. S’mund të imponohemi, duhet ti imponohemi të ardhmes me punë. BE është aleat i pazëvendësueshëm”, tha Rama
“Open Balkan” është një nisme e iniciuar nga kryeministri Edi Rama, president serb Alexandër Vuçiç dhe kryeministri Maqedonisë së Veriut Zoran Zaev për të implementuar në rajon katër liritë e BE
