Protagonistët e kronikës së zezë zakonisht janë emra të njohur për policinë dhe opinionin publik. Por në rastin e Ergys Dashit, duket se ky rregull funksiononte ndryshe. Kështu ishte deri më datë 23 janar 2022. Pikërisht në këtë mbrëmje, 20 plumba u derdhën ndaj 34-vjecarit shqiptar në Ekuador. Më pas do të dilte në pah edhe e shkuara e tij në botën e narkotrafikut. Teksa kanë kaluar tashmë rreth 8 muaj nga vrasja e tij, gazetari Artan Hoxha ka mbërritur pikërisht në lokalin ku Ergys Dashi u eliminua nga një vrasës me pagesë teksa konsumonte ushqimin nën shoqërinë e një miku të tij. Hoxha ka mundur të kontaktojë me menaxherin e restorantit i cili ka shpjeguar se si autori i maskuar dhe me një buqetë me lule në dorë iu afrua Dashit edhe e ekzekutoi në vend.
Hoxha shprehet se në Guayaquil, vrasësit i gjen me shumicë në rrethinat e qytetit ku jetohet në varfëri ekstreme, për pagesa qesharake, nga 100 deri 500 dollarë.
Kur kanë kaluar 8 muaj nga ky atentat, autoritetet vendase jo vetëm nuk kanë gjetur vrasësit, por duket se as qe kanë ndërmend të merren, me atë që ka ndodhur.
Për ta, shqiptarët, vijnë nga një vend ekzotik krejt i panjohur dhe i cilësojnë përgjegjës për fatin e tyre, pasi janë përfshirë në nivele të lartë, në trafikun ndërkombëtar të kokainës.
Ndërsa organizatat kriminale ekuadoriane, kryejnë aq shpesh atentate, sa e kanë kthyer Guayaquilin, në njërin nga qytetet më të rrezikshme të botës.
Discussion about this post