Koreja e Veriut ka lëshuar një raketë balistike ndërkontinentale që ra pranë ujërave japoneze në provën e dytë të madhe të armëve këtë muaj që tregoi një aftësi të mundshme për të nisur sulme bërthamore në të gjithë territorin e SHBA-së.
Ministri japonez i mbrojtjes tha se rrezet e raketës mund të mbulojnë të gjithë territorin e Shteteve të Bashkuara.
Ndërsa është e paqartë nëse Koreja e Veriut zotëron raketa funksionale të armatosura bërthamore, disa ekspertë thonë se lëshimi i së premtes përfshin raketën e saj me rreze më të gjatë veprimi, e cila është ende në zhvillim dhe është projektuar për të mbajtur disa mbushje bërthamore për të kapërcyer sistemet e mbrojtjes raketore të SHBA.
Provat e fundit të armëve të Koresë së Veriut synojnë të avancojnë arsenalin e saj bërthamor për të marrë lëshime më të mëdha në diplomaci në të ardhmen. Ajo vjen pasi Kina dhe Rusia kanë kundërshtuar lëvizjet e SHBA për të ashpërsuar sanksionet e OKB-së që synojnë frenimin e programit bërthamor të Koresë së Veriut.
Reagimi
Shtetet e Bashkuara e dënuan shpejt lëshimin dhe u zotuan të marrin “të gjitha masat e nevojshme” për të garantuar sigurinë e territorit të saj dhe aleatëve të saj, Korenë e Jugut dhe Japoninë. Nënpresidentja Kamala Harris u takua me udhëheqësit e atyre vendeve dhe të Australisë, Kanadasë dhe Zelandës së Re, të cilët po marrin pjesë në një forum rajonal në Bangkok për të diskutuar çështjen.
“Ne përsëri i bëjmë thirrje Koresë së Veriut që të ndalojë aktet e mëtejshme të paligjshme, destabilizuese. Në emër të Shteteve të Bashkuara, unë riafirmoj angazhimin tonë të hekurt ndaj aleancave tona të Indo-Paqësorit”, tha zonja Harris në fillim të takimit. “Së bashku vendet e përfaqësuara këtu do të vazhdojnë të nxisin Korenë e Veriut që të angazhohet për diplomaci serioze dhe të qëndrueshme.” /VOA/
Discussion about this post