Të tjera detaje raportohen mbi dosjen e SPAK, lidhur me atë që SPAK e konsideron si grupi kriminal në trafikun e drogës, ku të hënën e 20 nëntorit, u arrestuan mes të tjerëve edhe Dedan Gjoni, shefi i Krimeve të Komisariatit nr.6, si dhe Erzen Breçani, ish-zyrtar i lartë i Policisë së Shtetit. Gjithashtu u shpall në kërkim Ervin Mata, një emër që doli në skenë në konfliktin e ndodhur në zonën e ish-Bllokut në Tiranë, në përplasjen me armë me Ervin Martinajn.
E ftuar në emisionin “Open”, gazetarja Klodjana Lala, tha se nga përgjimet duket se kreu i bandës kriminale është Ervin Mata. Sipas Lalës, ai duket se e urdhëronte djalin e Breçanit, i cili është i martuar me motrën e Matës.
Po ashtu Lala tha se Mata është një person me lidhje shumë të forta, madje me lidhje edhe me politikën në vend, ku thuhet se ka investuar paratë në disa biznese.
“Ervin Mata nuk është personazh i thjeshtë, pjesën më të madhe e kalon në Peru që ka lidhje të forta në vendet e BE, jo vetëm me kartele… ai ka pasur këtu dhe mbështetje politike, ai ka investuar paratë në biznes. Ai ka lëvizur në disa vende. Këtë verë në informacionet që kam, ka ardhur në Shqipëri, por nuk ishte i kërkuar”, tha ajo.
Discussion about this post