Deputetë të opozitës, të ndarë mes grupimeve të Sali Berishës dhe Gazment Bardhit, zhvilluan sot takimin e dytë për të koordinuar qëndrimet në Parlament në aksionin anti-Qeveri.
Pas takimit, Bardhi duke folur si kryetar i Grupit Parlamentar, tha se kemi rakoduar agjendën parlamentare dhe aksionin tonë parlamentar dhe politik.
“Kemi marrë disa vendime të rëndësishme që kanë të bëjnë me çështje në interes të qytetarëve, së pari grupi parlamentar i Partisë Demokratike dhe Aleancës për Ndryshim kanë vendosur të propozojnë një paketë ligjore dhe kanë ngarkuar ekspertët e grupit për të nisur menjëherë punën përsa i përket rritjes së pensioneve, masës së ndihmës ekonomike dhe skemës së pagesës për personat me aftësi të kufizuara duke përfshirë edhe çuarjen përpara të projektligjit për përcaktimin e minimumit jetik.
Ky ishte vendimi i parë që u diskutua sot, ndërsa sa i takon llogaridhënies së qeverisë kanë ndërtuar një agjendë të plotë të komisioneve parlamentare ku do të ketë seanca dëgjimore në këto komisione për çështje në interes të publikut, dua të sjell në vëmendje një seancë dëgjimore sa i përket abuzimeve me fondet e Bashkimit Europian për bujqësinë, pra parlamenti do të duhet të njihet me raportin e zyrës anti-korrupsion të Bashkimit Europian që i është dorëzuar qeverisë shqiptare dhe më pas ministria e Bujqësisë do të duhet të raportojë në komisionin përkatës parlamentar”, u shpreh Bardhi.
Ai shtoi se një çështje tjetër që do të duhet të raportohet ka të bëjë me sigurinë në objektet ushtarake.
Ndërkohë nga seanca e fundit parlamentare, Bardhi tha se ka një çështje të mbetur pezull që ka të bëjë me mocionin me debat dhe kërkesën për interpelancë me kryeministrin sa i përket aferës së inceneratorëve.
I pyetur se kush është kryetar i Grupit Parlamentar të PD, Bardhi tha se nëse Lulzim Basha do të ketë mbështetjen e 18 deputetëve, atëherë vota e 19 do të jetë e tij dhe ai mund të marrë drejtimin e Grupit, nëse e aspiron këtë funksion. Bardhi ka shmangur komentet ti zhvillimet në PD, ndërsa tha se takimet mes deputetëve kanë të bëjnë vetëm me agjendat parlamentare.
Discussion about this post