Champions League/ Klubet elitare të Europës mësojnë rivalët

Është hedhur pasditen e sotme, në Monako, shorti i fazës së grupeve të UEFA Champions League, për sezonin 2023/24.

Ceremonia e zhvilluar në “Grimaldi Forum”, ishte spektakolare, jo vetëm për shortin, por edhe për prezencën e yjeve të shumta të futbollit europian që kanë shkruar historinë e kompeticionit si dhe për çmimet individuale që u ndanë për performancat e sezonit që sapo lamë pas.

Edhe këtë sezon, kompeticioni elitar i futbollit për klube, do të zhvillohet pa praninë e skuadrave ruse, të cilat janë përjashtuar nga kupat europiane, për shkak të pushtimit që Kremlini po kryen në Ukrainë. Vetë skuadra ukrainase, prezente në kompeticion, Shakhtar Donetsk, do t’i zhvillojë ndeshjet si pritëse, në Hamburg të Gjermanisë.

Përsa i përket shortit të fazës në grupe, goglat rezervuan duele spektakolare me grupin F që do të jetë “grupi i ferrit”, megjithatë pati dhe skuadra që patën një fat të madh si rasti i Realit të Madridit, që duke përjashtuar Napolin, do të përballet me Bragën dhe Union Berlinin. Faza në grupe do të fillojë më 20 shtator. Ndërkohë, akti final i këtij kompeticioni, do të zhvillohet në Londër.

GRUPET

A: Bayern; Manchester United; Copenhagen; Galatasaray

B: Sevilla; Arsenal; PSV Eindhoven; Lens

C: Napoli; Real Madrid; Sporting Clube de Braga; Union Berlin

D: Benfica; Inter; FC Salzburg; Real Sociedad

E: Feyenoord; Atletico Madrid; Lazio; Celtic

F: PSG; BVB Dortmund; Milan; Newcastle United

G: Manchester City; RB Leipzig; Crvena Zvezda; Young Boys

H: Barcelona; Porto; Shakhtar Donetsk; Royal Antwerp

Presidenti i UEFA-s, Aleksander Ceferin nderoi me “Çmimin e Presidentit”, legjendën gjermane Miroslav Klose, për karrierën e tij fantastike, të kurorëzuar me Kupën e Botës në vitin 2014.

Futbollistja e Vitit, u shpall spanjollja Aitana Bonmati, që aktivizohet te Barcelona, ndërsa për meshkujt, çmimin e fitoi norvegjezi Erling Haaland.

ÇMIMET INDIVIDUALE

Trajneri i vitit (futboll për meshkuj): Pep Guardiola

Trajnerja e vitit (futboll për femra): Sarina Wiegman

Futbollisti më i mirë: Erling Haaland

Futbollistja më e mirë: Aitana Bonmati

Çmimi i Presidentit: Miroslav Klose

/m.b /gijotina.com