UEFA Champions League rikthehet mbrëmjen e sotme me takime interesante. Në Frankfurt, Napoli do kërkojë të vazhdojë ecurinë pozitive që po e karakterizon këtë sezon. Djemtë e Spaletit kërkojnë të sigurojnë kalimin në çerekfinale që në takimin e parë ndaj Eintrachtit që duhet thënë se në shtëpi është shumë i rrezikshëm. Osimhen me shokë do të jenë të impenjuar në atë që shumë analistë e cilësojnë si një nga provat e vërteta të sezonit, duke parë që në kampionat, nuk kanë pothuajse fare konkurrencë.
Takimi tjetër i mbrëmjes luhet pak kilometra larg, më saktësisht në Dortmund. Borussia dhe Chelsea, numërojnë sëbashku plot tre tituj të UEFA Champions League, me londinezët që kanë shpenzuar shumë gjatë viteve për të ardhur deri në këtë pikë. Takimi është një test i rëndësishëm për Graham Potter dhe afrimet e janarit. Nga ana tjetër, gjermanët, janë në një formë të shkëlqyer në Bundesliga, ku në pesë takimet e fundit kanë po kaq fitore. Ky vit ka qënë i vështirë për ta, si rrjedhojë e largimit të Erling Haaland, drejt Manchester Cityt por, fantazia dhe grinta e Bellingham si dhe veprimet magjike në fushë të amerikanit Giovanni Reyna pritet të bëjnë diferencën në Signal Iduna Park. Takimet e sotme do të nisin në orën 21:00.
Discussion about this post