Champions/ Siti dhe Reali dhurojnë spektakël dhe lënë të hapur kualifikimin, Juvja vuan ndaj PSV; Dortmundi me “një këmbë” në turin tjetër

Përfundojnë ndeshjet e raundit të parë të fazës me eliminim direkt në Champions League. Supersfida e luajtur në “Etihad Stadium” mes Mançester Sitit dhe Realit të Madridit është mbyllur me fitoren e madrilenëve me rezultatin 2-3, duke lënë të hapur kualifikimin në ndeshjen e kthimit.

“Qytetarët” zhbllokuan ndeshjen në minutën e 19.Sulmuesi norvegjez, Erling Haland, tregon aftësinë e tij para portës, teksa me një gjuajtje të lehtë dhe të kalibruar dërgoi topin në rrjetë pas asistimit nga Josko Gvardiol.

Reali i Madridit barazoi shifrat në minutën e 60.Kilian Mbape bëri të heshtin tifozët në “Etihad” pasi dërgoi topin në rrjetën e anglezëve.

Sulmuesi francez, pas një pasimi spektakolar të Sebajos lëshoi një gjuajtje të menjëhershme nga brenda zonës duke mposhtur portierin Ederson.

Në minutën e 80, Erling Haland nuk fali nga pika e bardhë e penalltisë, duke i dhënë avantazhin e përkohshëm ekipit të tij që vazhdon krizën e rezultateve.

Në minutën e 86, rrjeta u tund sërish në “Etihad”, kësaj here ishte Brahim Diaz që mposhti portierin Ederson dhe barazoi shifrat. Futbollisti zgjodhi të mos festonte për shkak të së shkuarës te “qytetarët”.

Kur ndeshja mendohej se do të mbyllej në paqe dhe dy ekipet do të “shtrëngonin duart”, skuadra e drejtuar nga Karlo Ançeloti gjeti golin e fitores, duke zhytur akoma edhe më shumë Sitin në krizë edhe në Champions League.

Në minutën e 90+2, Belingam shënoi në shtesë dhe shtangu tifozët vendas.

Juventusi ka mposhtur me vështirësi 2-1 PSV Eindoven.

Italianët realizuan të parët me Ueston MekKeni në minutën e 34, ndërsa në krahun tjetër miqtë iu gëzuan golit të Ivan Perisiç në minutën e 56.

Sulmuesi kroat rikthehet kështu të ndëshkojë bardhezinjtë, teksa në të kaluarën e ka bërë me fanelën e Interit, klub me të cilin luajti për plot 7 vite.

Në minutën e 82, Mbangula ishte ai që vulosi fitoren e bardhezinjve, duke mbajtur gjallë shpresat e Juves për në turin tjetër.

Në ndeshjen tjetër, Dortmundi ka triumfuar në transfertë me rezultatin e pastër 0-3, duke vendosur njërën këmbë në turin tjetër të Champions League.  Serhu Girasi zhbllokoi sfidën në minutën e 60, ndërsa Paskal Gros 8 minuta më vonë dyfishoi shifrat për verdhezinjtë.

Karim Adejemi me golin e realizuar në minutën e 82 i vendosi vulën këtij takimi dhe kualifikimin pothuajse 100% të Dortmundit.