Chelsea festoi me një kopje të kupës? Trump: Trofeun e vërtetë e kam unë, FIFA ma fali

Një rrëfim i pazakontë ka dalë në dritë vetëm pak ditë pas përfundimit të Kampionatit Botëror për Klube në Shtetet e Bashkuara.

Sipas mediave ndërkombëtare, Presidenti amerikan Donald Trump ka pohuar se është ai që ka në pronësi trofeun origjinal të turneut, ndërsa Chelsea, fituesi i finales, ka marrë vetëm një kopje të tij.

Sipas versionit të dhënë nga vetë Trump për DAZN, FIFA i kishte kërkuar që ta mbante përkohësisht trofeun në Zyrën Ovale të Shtëpisë së Bardhë, përpara fillimit të kompeticionit. Por kur Trump më pas pyeti se kur do të vinte momenti për ta dorëzuar trofeun, kreu i FIFA-s Gianni Infantino thuhet se i është përgjigjur me një fjali të habitshme: “Nuk do ta marrim kurrë, mund ta mbash.”

Trump e tregoi ngjarjen me stilin e tij karakteristik: “FIFA më tha: ‘Mund ta mbash për pak kohë këtë trofe?’. E vendosëm në Zyrën Ovale. Më vonë pyeta: ‘Kur do ta merrni?’ dhe Gianni m’u përgjigj: ‘Nuk do ta marrim më, është i yti.’”

Kjo deklaratë e bujshme, e cila deri më tani nuk është komentuar zyrtarisht nga FIFA apo Chelsea, ka ngjallur jo pak habi dhe konfuzion në rrjetet sociale.

Nëse është e vërtetë apo një tjetër fabul “alla Trump”, mbetet për t’u parë, por ajo që është e sigurt, është se një tjetër episod i pazakontë është shtuar në historinë tashmë plot ngjarje të çuditshme të Donald Trump.