Chelsea ka shkatërruar ëndrrën e Real Betisit për të fituar titullin e parë evropian, duke i mposhtur në finalen e Ligës së Konferencës me rezultat 4-1. Fitorja e londinezëve jo vetëm që i dha fund aventurës evropiane të Real Betisit, por edhe përforcoi më tej statusin historik të Chelseat në futbollin kontinental. “Blutë e Londrës” janë tashmë skuadra e vetme që kanë fituar të gjitha kompeticionet kryesore evropiane të UEFA-s: Ligën e Kampionëve, Kupën e Kupave, Kupën UEFA, Ligën e Evropës, Ligën e Konferencës dhe Superkupën e Evropës. Për më tepër, ata kanë fituar edhe Kupën e Botës për Klube në vitin 2021.
Karriera evropiane e Chelsea nisi që në sezonin 1970-71, kur ata fituan Kupën e Kupave ndaj Realit të Madridit në një finale që u vendos pas një ndeshjeje të përsëritur. Ata e përsëritën këtë sukses në vitin 1998, duke mposhtur Stuttgartin në finalen e po të njëjtit kompeticion.
Në shekullin e 21-të, Chelsea ka fituar dy herë Ligën e Kampionëve, në vitin 2012 ndaj Bayern Munich në finale pas penalltive dhe në vitin 2021 ndaj Manchester Cityt, në një finale angleze. Ata kanë triumfuar gjithashtu dy herë në Ligën e Evropës, në vitin 2013 ndaj Benficës dhe në 2019 ndaj Arsenalit. Përveç kësaj, Chelsea ka fituar dy herë edhe Superkupën e Evropës, në vitin 1998 kundër Realit të Madridit dhe në vitin 2021 kundër Villarrealit.
Në total, Chelsea ka nëntë tituj kontinentalë dhe një titull botëror për klube, një rekord që i vendos ata ndër klubet më të lavdishme në historinë e futbollit evropian.
Discussion about this post