Çifti më i suksesshëm në muzikën popullore, Hysni Alushi dhe Enkelejda Arifi, treguan në “Abc e Pasdites”, se kauza çame është përherë pjesë e tyre, jo vetëm në jetën e përditshme por edhe në këngët e tyre.
Të dy thanë se rrugëtimi i shqiptarëve të Çamërisë është ende një plagë e hapur, dhe se politika e arti është e pamundur të mos përzihen.
“Rrugëtimi i shqiptarëve të Çamërisë vazhdon të ngelet një plagë e hapur, një ëndërr e parealizuar. Shembulli më i mirë është gjyshja ime e cila ka pak muaj që është ndarë nga jeta dhe nuk u kthye ta rishikonte edhe njëherë vendlindjen e saj”, tha Enkeleda.
Kur moderatori i pyet nëse ka pasur ndonjëherë pengesa nga autoritet greke, duke qenë se janë artistë çamë dhe i këndojnë Çamërisë, ata përgjigjen se kanë pasur dy raste kur koncertet kanë dështuar.
“Ka pasur dy raste kur koncertet kanë dështuar sepse një ditë apo dy ditë akoma më herët se të shkonim në koncert e kanë marrë vesh dhe e kanë pezulluar. Më pas kemi qenë në Athinë dhe Selanik në mbrëmje festive, por jo në mënyrë të organizuar siç duam ne koncert nuk kemi arritur ta realizojmë”, rrëfeu Enkeleda.
Ndërkohë Hysniu pohoi se nuk i kanë lënë hapësirë që të shkojnë, madje nga Qafë Bota nuk tentojnë të ikin të dy bashkë sepse autoritet greke i njohin këngët e tyre, i kanë dëgjuar dhe ndaj udhëtojnë përmes Athinës ose Selanikut.
Discussion about this post