Burimet për Gijotina.com tregojnë se në ditët në vijim në mbledhjen e qeverisë do të miratohen edhe disa zv.ministra të kabinetit “Rama 3”. Po të njëjtat burime tregojnë se disa zv.ministra aktualë do të vijojnë të mbajnë pozicionet që kanë.
Ndërkohë ka edhe emra të tjerë të përzgjedhur prej shefit të qeverisë Edi Rama dhe stafit të tij.
Enio Civici pritet të shkojë si zv.ministër i Bujqësisë dhe Zhvillimit Rural. Turizmin dhe Mjedisin duket se Edi Rama do ta lerë tërësisht në dorë të grave. Mirela Kumbaros do t’i çojë si zv.ministre dy ish-deputete të PS-së. Bëhet fjalë për Vilma Bellon e qarkut Vlorë dhe Almira Xhembullën e qarkut Dibër. Pa drejtues të konfirmuar janë edhe disa institucione të tjera të rëndësishme në vend.
Ditë më parë u emërua në krye të Postës Shqiptare, Ervin Bushati, kryetari i PS-së në Tiranë. Për Tatimet deri më tani janë përfolur disa emra si Besart Kadia, Dionis Imeraj, Olti Muzaka apo Elena Pici. Për zv.ministrat dhe sekretarët e përgjithshëm, Edi Rama iu ka lënë porosi ministrave të flasin me dy njerëzit e tij të besuar, përkatësisht Vali Bizhgën dhe Ëngjëll Agaçin. Sipas informacioneve, lëvizjet do të bëhen gradualisht, javë pas jave.
