Ofensiva qeveritare për pallatet pa leje në Tiranë dhe në qytete të tjera po zbulon çdo ditë e më shumë se ajo ishte ndërtuar mbi dy shtylla, të cilat nuk kanë lidhje as me ligjin dhe as me parimin e moralin. Shtylla e parë ishte “kërcënimi” i biznesmenëve të ndërtimit para zgjedhjeve lokale të 14 Majit 2023. Shtylla e dytë ishte “show” me bllokimin e pallateve të biznesmenëve shumë pranë qeverisë, si Pëllumb Salillari dhe Arben Maloku.
Diçitura: Zyrtari socialist, Arben Maloku
Raportimet mediatike tregojnë se Gjykata Administrative e Tiranës i ka hequr pjesën më të madhe të godinës së konfiskuar të Pëllumb Salillarit në zonën e Liqenit të Thatë, ku u zbuluan rreth 2 mijë metra katrorë ndërtim pa leje. Ky vendim gjyqësor ka kaluar në heshtje të plotë nga kryeministri Edi Rama, të cilit duket se i ka ardhur për shtat qëndrimi i gjykatës.
Një rrugë të ngjashme po ndjek së fundmi edhe Arben Maloku, një zyrtar i rëndësishëm në administratën e Erion Veliajt në Bashkinë e Tiranë, njëkohësisht ndërtues. Kompania “Arb Trans 2010”, e krijuar prej Arben Malokut dhe që tashmë menaxhohet nga babai i tij, u kap në flagrancë duke ndërtuar kate pa leje në një pallat, në rrugën “Myslym Shyri”.
Diçitura: Pallati me kate pa leje i Arben Malokut
Këshilli Kombëtar i Territorit (KKT), nën drejtimin e Edi Ramës, vendosi në Tetor të vitit 2022 konfiskimin e pallatit, në bazë të një Vendimi të kontestuar të Këshillit të Ministrave, i cili gjithësesi është në fuqi.
Vendimi i konfiskimit nuk është kapërdirë nga kompania e Arben Malokut. Ai merr një vendim, i cili do të dukej absurd në një situatë normaliteti shqiptar-Arben Maloku vendos të hedh në gjyq KKT-në dhe rrjedhimisht, kryetarin e saj, Edi Ramën.
Diçitura: Vendimi i Këshillit Kombëtar të Territorit për konfiskimin e pallatit me kate pa leje të kompanisë “Arb Trans 2010”
A është vallë kaq i fortë Arben Maloku, një “çirak” në Partinë Socialiste, që të guxojë e të padisë kryetarin fuqiplotë të partisë së tij? Kjo duket thuajse e pamundur. Atëherë, dyshimi më i fortë është që konfiskimi i pallatit të Arben Malokut të jetë pjesë e “shoë-t” të Edi Ramës.
Duket se çdo gjë është e parashikuar që problemi të marrë zgjidhje në gjykatë në favor të Arben Malokut dhe Edi Rama, ashtu si në rastin e Salillarit, të vijojë të mbajë heshtjen shurdhuese e të bën sikur nuk e ka mendjen.
Padia, Maloku “kundër” Ramës
Pak ditë më parë, Gjykata Administrative e Tiranës ka regjistruar padinë e shoqërisë “Arb Trans 2010” kundër Këshillit Kombëtar të Territorit.
Diçitura: Padia e Arben Malokut (Arb Trans 2010) kundër Edi Ramës (KKT)
Në këtë padi, kompania private e Arben Malokut dhe familjarëve të tij, ka renditur 3 kërkesa kryesore:
Së pari, marrjen e masës së sigurimit të padisë përmes pezullimit të Vendimit të Këshillit Kombëtar të Territorit nr. 10, dt. 19.10.2022 “Për konfiskim për interes publik të objektit godinë banimi dhe shërbime 4-5 dhe 9 kate, me 2 kate parkimi, në rrugën Myslym Shyri, Tiranë, të ndërtuar në tejkalim të lejes së ndërtimit, si edhe çdo akti administrativ të dalë në zbatim të tij.
Së dyti, pezullimin e shqyrtimit të çështjes dhe dërgimin e saj në Gjykatën Kushtetuese të Vendimit të Këshillit të Ministrave që normon konfiskimin e pallatit.
Së treti, konstatimin e pavlefshmërisë absolute të vendimit nr.10, dt. 19.10.2022 të Këshillit Kombëtar të Territorit që lidhet me pallatin e ndërtuar nga kompania “Arb Trans 2010”.
Pra, në të treja pikat kryesore të padisë së Arben Malokut, ai e vendos veten kundër “liderit” të partisë. Një lëvizje shumë e guximshme e tij, e cila mund të besohet vetëm nëse e gjitha është një lojë e Ramës me vartësit e tij në parti.
Lexo edhe: Ilir Kulla: Po të mos ishte në burg Fredi Beleri nuk i fitonte zgjedhjet
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post