Pas 13 ditësh bllokim e tension, Veriu i Kosovës i është rikthyer normalitetit. 2 tetori ka qenë dita dhe afati i tërheqjes së Njësive Speciale të Policisë dhe zhbllokimit të rrugëve për në Jarinje e Bërnjak sipas marrëveshjes së arritur nga Kosova e Serbia në Bruksel.
Që prej orës 8 të mëngjesit ka nisur lirimi i njërës prej korsive të rrugës në pikat kufitare mes Kosovës dhe Serbisë, në Jarinjë dhe Bërnjak, ndërsa deri në orën 16:00 gjithçka pritet të jetë rikthyer në normalitet.
Pjesëtarë të KFOR-it janë parë pranë dy pikave kufitare. Në bazë të marrëveshjes Kosova dhe Serbia janë dakordësuar që të mbulojnë simbolet shtetërore në targat e automjeteve kur të hyjnë në territoret respektive.
Ndërsa barrikadat dhe forcat speciale të largohen nga Jarinja dhe Bërnjaku, Policia e Kosovës do të zëvendësohet nga KFOR-i që do të qëndrojë në pikat kufitare për dy javë.
Delegacionet e dy shteteve, me ndërmjetësim të Bashkimit Evropian, kanë arritur pajtueshmëri më 30 shtator për çështjen e targave dhe zhbllokimin e veriut. Udhëheqësit e Kosovës dhe Serbisë janë shprehur të kënaqur me atë që kanë arritur delegacionet e tyre.
Sipas marrëveshjes së arritur në Bruksel, barrikadat dhe njësitë speciale të Policisë dhe Kosovës do të tërhiqen paralelisht. Këto pika kufitare u bllokuan që prej 20 shtatorit, pas vendosjes së masës së reciprocitetit për targat nga ana e Kosovës.
Kosova e Serbia do të vijojë dialogun me një grup pune të ngritur e kryesuar nga Bashkimi Europian.
