Shqipëria në shitje! Nga pronat në bregdet, te trojet në qytetet kryesore, pyjet apo lumenjtë. Gjithçka shitet në këtë vend, ku vetëm një “grusht” njerëzish po përfitojnë, teksa “barra” u ka rënë shqiptarëve, që po vazhdojnë të jetojnë në këtë vend. Ata po shikojnë sesi pushtetarë, me rroga mesatare, kanë ngritur perandori, apo personazhe të dala nga hiçi shfaqen si biznesmenë të fuqishëm. Padyshim që lidhja me pushtetin ka bërë të pasur këta persona, të cilët po përfitojnë me manovra nga më të ndryshmet. Fillimisht, ishte “loja” me koncesione, ku një grusht firmash morën gjithçka mundën, nga nafta, uji, nëntoka e mbitoka.
Madje, po marrin edhe erën dhe ajrin. Dhe, kur mbaruan këto pasuri, u “shpikën” investimet strategjike, ku pasuria private dhe shtetërore po u jepet firmave me lidhje me politikën. Ndërkohë, pa i dalë ende “boja” Investitorëve Strategjikë, mazhoranca po vepron me dhënien me qira të pasurisë së shqiptarëve. Dhe, a do ndalen?!
Sipas dokumenteve që disponon Boldnews.al, Jorgo Goro, kryetari socialist i Bashkisë Himarë, ka nxjerrë një njoftim, ku jep me qira dhjetëra hektarë pyje me “pamje nga deti” në afërsi të plazhit të Qeparosë, në fshatin Kudhës. Në dokumentin e mësipërm detajohet se objekti i kontratës është “dhënia në përdorim, qira me anë të konkurimit publik të fondit pyjor kullosor publik, të ekonomisë pyjore, me sipërfaqe 10. 3098590 ha”, thuhet në këtë dokument. Më tej shkruhet se prona “shtrihet në ngastrat pyjore 16, 17 dhe 18 A të fondit pyjor kullosor publik të ekonomisë pyjore ‘Gjomollë’”.
Bashkia Himarë ka përcaktuar se qëllimi i dhënies me qira të pasurisë është për qëllime pushimi, argëtimi, shëndetësore, shoqërore dhe për veprimtari turistike kampingje (kënde lodrash, mjedise sportive, shlodhëse etj). “Vlera fillestare e fillimit të procedurës konkurruese për dhënien me qira të pasurive të mësipërme është 1.030.985 lekë në vit. Afati maksimal i dhënies me qira të kësaj pasurie është 10 vite” thuhet në dokumentin që ka njoftuar Bashkia Himarë. Pra, një tjetërsim i pronës publike nga kjo bashki, e cila në të kaluarën është lidhur me skandale të një pasnjëshme.
Në dokumentin që ka publikuar në APP, Bashkia e Himarës ka përcaktuar se prona është në Gjomollë. Burime të Boldnews.al shprehen se prona është në afërsi të rrugës së re të Lumit të Vlorës, që tashmë del në det nga Kuçi në Qeparo. Pra, në segmentin e ri, ku dhjetëra hektarë buzë rrugës do ti jepen privatit.
Bëhet fjalë në afërsi të fshatit Kudhes, i cili njihet për pyjet e dendur, por që vitet e fundit po shkatërrohen, si pasojë e lejeve që ka dhënë Bashkia e Himarës për qymyr dhe prerje apo pastrim si i shkruajnë në dokumente. Por, atë pjesë që ka ngelur, Goro ia ka vënë syrin dhe synon që të çojë njerëzit e afërt, apo persona me të cilët ka bashkëpunuar në të kalurën. Jo më kot, në dokumente Goro do të zhvillojë ankandin në fund të muajti korrik, ku vëmendja e të gjithëve është te pushimet. Por, Boldnews.al do të jetë “sy e veshë” te kjo aferë dhe do të denoncojë çdo tentativë të vjedhjes së pronave publike.
Discussion about this post