Policia ka ndaluar një drejtues automjeti në Rrugën e Kombit i cili ka qenë duke lëvizur me shpejtësi 205 km/orë.
Në momentin e ndalimit shoferi i automjetit “Audi A8” është ndëshkuar me 40 000 lekë të rinj dhe me masë plotësuese.
Në dy javët e para të muajit korrik janë ndëshkuar 144 drejtues automjetesh që lëviznin me shpejtësi nga 150 km/orë deri në 205 km/orë.
Policia i ka bërë apel drejtuesve të automjeteve të mos lëvizin me shpejtësi duke rrezikuar jetën dhe shëndetin.
Njoftimi i policisë
Mos shpejtoni të arrini detin, duke rrezikuar jetën dhe shëndetin!
Qarkulloi me shpejtësi 205 km/orë, në Rrugën e Kombit, konstatohet nga mjetet inteligjente të Njësisë së Policisë Rrugore për Sigurinë e Autostradës “Milot-Morinë”, si dhe ndëshkohet me masë administrative 40 000 lekë të rinj dhe me masë plotësuese, drejtuesi i një automjeti tip “Audi A8”.
Gjatë 2 javëve të para të muajit korrik, shërbimet e Njësisë së Policisë Rrugore për Sigurinë e Autostradës “Milot-Morinë”, të pajisura me mjete logjistike bashkëkohore, ndëshkuan 144 shtetas që drejtonin automjetin përkatës, me shpejtësi nga 150 km/orë deri në 205 km/orë, prej tyre:
-135 shtetas kosovarë u ndëshkuan me masë administrative sa dyfishi i masës administrative që parashikon Kodi Rrugor;
-9 shtetasve shqiptarë iu është pezulluar leja e drejtimit për periudha nga 3 deri në 12 muaj, si dhe iu janë zbritur nga 5 deri në 8 pikë nga leja përkatëse e drejtimit.
Gjithashtu, gjatë kësaj periudhe, 70 automjete janë shpallur “Alert”, pasi qarkullonin me shpejtësi tej normave të lejuara, në tunelin e Kalimashit.
Në fundjavë, në çdo aks ka radarë.
Udhëto me jetën në mendje! Destinacioni pret.
Nëse konsumon pije alkoolike gjatë fundjavës, mos drejto automjetin, por përdor mjetet e transportit publik!
Hiq celularin nga dora!
Shto vigjilencën!
Policia qëndron në rrugë për të të këshilluar dhe për të të ndihmuar. Qëllimi i vetëm i Policisë Rrugore, mbrojtja e jetës dhe e shëndetit të përdoruesve të rrugës.
Discussion about this post