Çmimi i naftës në shifra rekord, Sula: Qeveria mblodhi 342 mln euro më shumë në këto 3 muaj

Deputeti i Partisë Demokratike, Dashnor Sula nëpërmjet një postimi në Facebook ka denoncuar vjedhjen që i bëhet shqiptarëve dhe në veçanti fermerëve me çmimin e naftës.

Me Shqipërinë që është bërë vendi i 10-të në botë me çmimin e naftës më të shtrenjtë, Sula thekson se babëzia e qeverisë dhe rimbursimi i oligarkëve janë ato që po shkaktojnë krizën aktuale.

POSTIMI I PLOTË:

Pse fermerët dhe shqiptarët e blejnë më shtrenjtë naftën!

Teksa qeveria vazhdon të fryjë xhepat duke vjelë më shumë taksa nga rritja e çmimeve, fermerët po përballen me falimentimin, ndërsa qytetarët me luftën për mbijetesë. Sipas INSTAT vetëm në 3 muajt e parë të këtij viti për shkak të rritjes së çmimeve, qeveria shqiptare mori 342 milionë euro më shumë sesa ishte parashikuar nga taksat.

Këto para nuk u rishpërndanë për qytetarët që të zbusin sadopak krizën por shkuan si gjithmonë tek oligarkët, klientë e qeverisë. Kujtojmë që pak javë më parë u mblodh qeveria për të vendosur rimbursimin e oligarkëve.

Ndërkohë nga ana tjetër fermerët dhe qytetarët shqiptar po njohin rekord pas rekordi të çmimit të naftës. Dje Bordi i Rritjes së çmimeve pa transparencë e çoi çmimin e naftës 265 lek për litër, duke na bërë vendin e 10 në botë me naftën më shtrenjtë. Vlen të theksohet se jemi ndër të fundit në rajon për pagën mesatare.

Por përse e blejnë shqiptarët kaq shtrenjt naftën?! Përgjigja është: për shkak të babzisë së qeverisë. Më posht janë taksat që merren nga shteti ynë për një litër karburant:

40 lek për litër akcizë

3 lek për litër Takse Karboni

27 lek për litër Takse Qarkullim

0.61 lek për litër Takse Markimi

40.275 lek për litër Tvsh 20%

Plus marzhi fitimit të BORD Transparence

3 lek për litër

Plus kosto për Transporti 2 leke/liter

110 lek të reja taksa të ndryshme për një litër karburant.

Kjo është e vërteta të dashur bashkëkombasit e mi. Kriza e çmimeve është e vërtet qe nuk ka prekur vetëm Shqipërinë, por është po aq e vërtetë se qeveria Shqiptare është e fundit në Ballkanin Perëndimor sa i përket masave që ka marrë për të përballuar këtë krizë. Këtë e tha Banka Botërore, as unë e as opozita.