Çmim i naftës në vendin tonë ka arritur në shifra rekord dhe sigurisht kjo ka sjellë goditje për bizneset dhe qytetarët. Në lidhje me këtë çështje ka reaguar Shoqata e Bizneseve dhe Konfidnustria, të cilat kërkojnë nga qeveria që të krijojë sa më shpejt Entin Rregullator të Karburanteve/ERRK për të lehtësuar biznesin dhe qytetarët nga pasojat e rënda ekonomike të krizave të përsëritura në këtë sektor. Përmes një njoftimi për media, Konfiundustria bën me dije se Enti Rregullator i Karburanteve duhet të ndërtohet dhe funksionojë sipas shembullit të vendeve të tjera të rajonit, që sot e kanë çmimin deri 30-40% më të ulët dhe cilësinë mjaft më të mirë sesa Shqipëria.
“Politikat ekzekutive dhe agjencitë rregullatore në tregun e karburanteve kanë dështuar plotësisht në mbrojtje të interesit publik dhe kanë lejuar praninë e grupimeve me shenja të qarta të tipit kartel dhe oligopol me shenja të korrupsionit “”kapje të shtetit”. Pasojat e keq ndërtimit të tregut të kartel të karburanteve janë shkatërruese në afatgjatë për ekonominë, biznesin dhe qytetarët”, thuhet në njoftim.
Sipas shoqatës së bizneseve , rritja e çmimit të karburanteve dhe energjisë, që ka filluar nga muaji shtator 2021 dhe në vazhdim, është shkaku kryesor i tejkalimit të inflacionit të shënjestruar të Bankës së Shqipërisë në mbi 3,8%, çmimeve të shportës bazë, rritjes së kostove të bizneseve me rrezik deri në falimentim dhe goditje të fuqisë konkurruese të ekonomisë kombëtare. Ndërkohë, Konfindustria vë ne dukje se gjatë muajit shkurt 2022 çmimi i naftës në tregun shqiptar arriti në nivelet më të larta historike dhe me kahje në rritje të mëtejshme, nëse nuk merren politikat mbrojtëse.
Discussion about this post