Lazio dhe CFR Cluj luajnë nesër në 21:00 për ndeshjen e parë në 1/8 e Conference League. Ndeshja e parë zhvillohet në “Olimpico” të Romës, me mbrojtësin shqiptar të “Shqiponjave”, Elseid Hysaj që ka folur para ndeshjes. Te rumunët kundërshtar i Hysaj do jetë edhe shqiptari i Kosovës, Ermal Krasniqi.
“Duam të fitojmë Conference League. Mund t’ia dalim. Të gjithë lojtarët duan të kenë një trofe më shumë në karrierën e tyre”, kështu e nisi deklaratën Elsi Hysaj.
Më pas Hysaj foli edhe për ecurinë e këtij sezoni në Serie A.
“Si po shkon ky sezon? Jam më i qetë dhe po përmirësohem. Nuk dua të dorëzohem deri në fund. Ndihem më i qetë se më parë. Kemi parë një video të Cluj, por fusha ishte e ngrirë. Kanë 3-4 lojtarë që bëjnë diferencën. Nuk duhet t’u lejojmë hapësira”, shprehet shkodrani.
Më pas një koment për Sarrin, me të cilin ka punuar edhe tek Empoli e Napoli.
“Ai nuk zbutet kurrë. Më pëlqen mënyra sesi i bën lojtarët të kuptojnë idetë e tij. E njoh prej vitesh, ai gjithmonë dëshiron të përmirësohet. Jemi një skuadër dhe një grup i madh. Duhet të përmirësojmë disi mentalitetin. Duhet t’i menaxhojmë mirë ndeshjet çdo tri ditë. Ndihem më mirë, pasi më keq se vjet nuk mund të bëhej. Më vjen mirë që kam rifituar besimin e të gjithëve. Puna të shpërblen gjithmonë”, përfundoi mbrojtësi Hysaj.
Discussion about this post