Conference League ka mbyllur sfidat e sotme, ndërsa janë shënuar një “mal” me gola në sfidën e zhvilluar në “Philips Stadium”, aty ku përballeshin PSV dhe Copenhagen, ku takimi u mbyll në barazim 4-4.
Skuadra angleze e Leicester City triumfoi përballë Rennes me shifrat 2-0, duke hedhur një hap të rëndësishëm drejt kualifikimit në fazën tjetër, teksa takimi i kthimit do të luhet në Francë.
Baseli i Taulant Xhakës u mposht nga Marseille me shifrat 1-2, në një takim që francezët iu falën polakut Arkadiusz Milik, i cili shënoi dopietë, ndërsa sulmuesi në pronësi të Interit, Sebastiano Espozito gjeti rrjetën për Baselin, duke mbajtur gjallë ëndrrën e zviceranëve për një kualifikim të mundshëm në sfidën e kthimit.
Ndeshja tjetër e mbrëmjes ishte ajo mes Bodo/Glimt dhe AZ Alkmaar, që u fitua me rezultatin 2-1 nga norvegjezët, falë një penalltie të ekzekutuar saktë nga Solbakken në minutën e 91-të.
Discussion about this post