Pas tërheqjes së Kolumbisë për shkaqe politike dhe trazirave në këtë vend, turneu i “Copa America” nuk do të luhet edhe në Argjentinë, për shkak të shtimit të rasteve me Covid-19, njoftoi CONMEBOL të dielën në mbrëmje. Kanë nisur të qarkullojnë zëra se kjo veprimtari nuk do të zhvillohet fare.
Për të mos dështuar turneu i 47-të i “Copa America”, që pritej të startonte më 13 qershor, mediat amerikano-latine raportojnë, se Kili edhe SHBA, janë të gatshëm të luajnë rolin e mikpritësit. “CONMEBOL është duke analizuar ofertat nga vendet e tjera që kanë treguar interes për pritjen e turneut kontinental,”– thotë “qeveria” e futbollit të këtij kontinenti në deklaratën e lëshuar.
Argjentina kishte shpërthimin e pestë më të madh në botë, me 76 raste ditore për 100,000 banorë ose më shumë se 34,000 raste ditore në total. Rastet në vend janë rritur me një normë prej 54 përqind gjatë 14 ditëve të fundit, duke krijuar pasiguri për ditët në vijim të periudhës kur do të luhen ndeshjet e “Copa America”.
