Pak kohë më para pohonte se fundi i koronavirusit mund të vinte në pranverë, tashmë Dr. Anthony Fauci, pranon se ai mund të mos eliminohet kurrë. Dr. Fauci, këshilltar i Presidentit amerikan Joe Biden dhe Drejtori i Sëmundjeve Infektive në Institutet Kombëtare të Shëndetit, e tha këtë gjatë një konference për shtyp në Shtëpinë e Bardhë mbi pandeminë.
Sipas Faucit, zhdukja e koronavirusit do të jetë e vështirë në të ardhmen e afërt, e ndoshta nuk do të ndodhë asnjëherë. E vetmja sëmundje e zhdukur sipas tij, është lija.
“Ekspertët e kujdesit shëndetësor po përpiqen për një shkallë të kontrollit të virusit që do të na lejonte të jemi në gjendje t’i kthehemi normalitetit që të gjithë e presim me padurim”, eshtë shprehur më tej Fauci. Drejtori i Sëmundjeve Infektive shpreson që rastet të ulen në 10 mijë, pasi aktualisht regjistrohen rreth 80 deri në 90 mijë raste.
SHBA regjistron numrin më të lartë të vdekjeve nga koronavirusi, më tepër se 717 mijë.
