Ka agravuar situata me Covid-19 në Berat, ku pesë shkolla rezultojnë të mbyllura pas shtimit të rasteve me Covid-19. Mësohet se, është shtuar numri i nxënësve të infektuar, ku vetëm gjatë 24-orëve të fundit rezultojnë pozitiv me Covid 18 nxënës të moshave 14-19 vjeç.
Covid-19 nuk ka kursyer as mësuesit dhe drejtorin e shkollës, pasi Gijotina.com ka mësuar se dhe ky i fundit është infektuar. Rezultatet e testeve të ardhura pranë ISHP-së Berat bëjnë me dije se, në çdo grup nxënësish prej 40 të testuar, 23 prej tyre kanë rezultuar “pozitiv”.
Testimet vijojnë çdo ditë, ndërsa situata paraqitet më problematike në shkollën 9-vjeçare “22 Tetori” dhe gjimnazin “Babë Dudë Karbunara” në Berat si dhe në shkollën 9-vjeçare “Karaman Ylli” në Skrapar.
Burime pranë Institutit të Higjenës Berat konfirmojnë se janë mbyllur 2 klasa në shkollën “22 Tetori”, 2 klasa në gjimnazin “Babë Dudë Karbunara” dhe 1 klasë në shkollën “Karaman Ylli”, ndërkohë që po vijon edhe hetimi epidemiologjik i rasteve, për të shmangur zinxhirin e infektimeve.
Discussion about this post