Javët e fundit janë rritur ndjeshëm infektimet me covid 19 në Shkodër , duke e bërë kështu edhe qarkun e dytë me numrin më të lartë të infektimeve ditore pas Tiranës.
Drejtoresha e Njësisë Vendore e Kujdesit Shëndetësor Shkodër, Xheni Halili shprehet se dasmat dhe funeralet janë burimi kryesor i rritjes së rasteve me covid -19 në kryeqendrën e veriut.
Halili tregon se mungesa e respektimit të masave ka çuar deri në rritjen e rasteve. Gjithashtu, ajo bën thirrje për respektimin e masave anti-covid.
“Kjo situatë vjen sepse masat që janë vendosur nuk janë zbatuar sa duhet. Një ndër vatrat kryesore janë dasmat dhe funeralet. Ne i bëjmë thirrje cdo qytetari që të respektojë masat,” thotë ajo.
Halili u shpreh se ka vaksina të mjaftueshme për gjithë qytetarët dhe mjafton që të paraqiten pranë qëndrave shëndetësore.
“Ne kemi vaksina mjaftueshëm nga Thethi në Velipojë që secili që dëshiron të vaksinohet të shkojë dhe ta marrë,” tha Halili.
Drejtoresha, Halili komentet i bëri gjatë ceremonisë së dhurimit të një autoambulancë për zonën e Velipojës. Ndërsa shtoi se tashmë edhe një e tillë është funksionale edhe në zonën turistike të Thethit.
Nga ana tjetër, drejtori i spitalit rajonal në Shkodër, Ardian Dajti tregon për Gijotina. Com se rastet janë rritur ndjeshëm dhe spitali i Shkodrës po trajton persona me covid 19 edhe pse nuk është i legalizuar si i tillë.
“Ne trajtojmë raste me covid 19 , por nuk jemi një spital i legalizuar si i tillë. Rastet janë shtuar ndjeshëm, si shkak i mos respektimit të masave anticovid. Shkodra është qarku i dytë me nr më të lartë të infektimeve. Kemi raste që i trajtojmë 24 orë , kemi nga ato raste që janë rëndë dhe duhet të qëndrojnë në spital, kemi nga ato raste që duan hospitalizim, pra kemi raste që po shtohen ndjeshëm dita ditës.”-tha drejtori Dajti.
Shkodra është qarku i dytë me numrin më të madh të infektimeve, ndërkohë që qytetrët janë të pa përgjegjshëm sa i takon respektimit të masave duke u bërë kështu edhe burim infeksioni për të tjetrët.
