Një ditë para nisjen së viti të ri shkollor 2021-2022, Ministrja e Arsimit dhe Sportit, Evis Kushi u është drejtuar me një urim të gjithë nxënësve.
“Kënaqësia më e madhe për mua është që ju nesër do të nisni vitin e ri shkollor dhe do t’i mbushni klasat tuaja me gjallëri dhe dashuri”, – shprehet ministrja në një video-mesazh postuar në rrjetet sociale.
Ajo thekson se në të gjitha institucionet arsimore janë marrë masat që ky vit shkollor të jetë sa më i mbarë.
“Kjo zyrë më shumë se sa e imja është e juaja dhe do të jetë gjithmonë e hapur për çdo nevojë apo shqetësim tuajin,” shprehet Kushi ndërsa u ka bërë thirrje nxënësve që t’i kushtojnë kujdes maksimal masave anti-Covid.
“Siguria dhe shëndeti juaj është elementi më i rëndësishëm për të gjithë ne, prandaj lutja ime për ju është që t’i respektoni të gjitha masat në shkollë,” tha ministrja.
Në video-mesazh kanë përcjellë mesazhe të veçanta edhe nxënës të klasave dhe shkollave të ndryshme.
Ruajtja e higjienës dhe mbajtja e maskave, ishte një prej mesazheve, ndërkohë që janë përcjellë edhe disa nga risitë që vijnë këtë vit për herë të parë në shkolla, si anglishtja për klasat e para, arti e zejet, apo klasat sportive.
Mësimi plotësues për të gjithë ata nxënës që donin të bënin një përsëritje të njohurive, ka filluar që më 1 shtator, ndërsa zyrtarisht viti i ri nis nesër. Më herët kryeministri Rama ka bërë me dije se tekstet shkollore për të gjithë nxënësit nga klasa e parë në të nëntë, do të jepen falas.
Prej disa ditësh Rama dhe ministrja e Shëndetësisë, Ogerta Manastirliu kanë bërë thirrje për vaksinimin e stafit akademik, nisur nga mësuesit e shkollave dhe pedagogët e universiteteve, deri tek studentët.
Vetëm të shtunën Ministria e Shëndetësisë ka publikuar urdhrin për t’u pajisur me certifikate vaksinimi çdo pedagog dhe student, para nisjes së mësimit në universitete më 11 tetor.
Në një dokument prej dy faqesh, gjithashtu sqarohet se cilido person që nuk do të pajiset me certifikatë vaksinimi, do t’i duhet të paraqesë testim PCR çdo jave për të qenë pjesë e auditorëve.
Në urdhër thuhet se për secilin student që nuk do t’i nënshtrohet marrjes së injeksionit, institucionet arsimore duhet të marrin masa për ofrimin e mësimit online. Të ndjekurit e mësimit online nuk është një praktike e re që implementohet në vendin tonë, pasi viti i shkuar akademik u ndoq nga të gjithë nivelet para dhe pas universitare online, ndërsa nuk përjashtohet mundësia të ndiqet sërish si praktikë. D.L/ Gijotina.com
