“Shqiptarët kanë shpenzuar 30 mln euro për ilaçe dhe mjekime gjatë pandemisë ndërsa qeveria i ka rimbursuar qytetarëve veç 231 mijë euro”
Kështu është shprehur në faqen e saj të Facebook-ut, deputetja e Partisë Demokratike, Jorida Tabaku, ku gjithashtu ka theksuar se as 1% e vlerës së harxhuar nuk ka shkuar për të ndihmuar qytetarët.
Ajo ironizon situatën, duke u shprehur se qeveria e përdor politikën për t’u pasuruar vetë.
“Fytyra e vërtetë e një qeveria që politikën nuk e përdor për ti shërbyer qytetarëve por tu pasuruar vete, të braktisur dhe në fatkeqësi!
Jemi vendi me varfërinë më të lartë në rajon, dhe me pagat më të ulëta. Kjo nuk mund të jetë mënyra se si qeveriset vendi ynë.”- thotë Jorida Tabaku.
Gjithashtu kujtojmë edhe monitorimin e VOA në Shqipëri ku theksohet se të sëmurët me Covid-19, që u kuruan në shtëpi gjatë 15 muajve të pandemisë u përballën me kosto të larta për mjekime nga fondet e veta, duke shpenzuar së paku 1 mijë dollarë për person. Ekspertët vërejtën se paketa e rimbursimit nga qeveria për shpenzimet ndau vetëm afro 40 dollarë për person.
