Rregullat e udhëtimit në Britaninë e Madhe për shkak të Covid-19 dhe refuzimit për të njohur vaksinat e administruara në zona të caktuara të botës kanë shkaktuar zemërim në Amerikën Latine, Afrikë dhe Azinë Jugore. Ata e kanë konsideruar këtë një politikë jo logjike dhe diskriminuese.
Ministri i Transportit, Grant Shapps, bëri me dije rregullat e udhëtimit të premten e kaluar si një sistem i ri i thjeshtuar për udhëtimet ndërkombëtare. Por në shumë pjesë të botës ka zemërim dhe zhgënjim ndaj vendimit të qeverisë për të njohur vetëm vaksinimet e injektuara në një grup të zgjedhur vendesh.
Sipas rregullave të reja, udhëtarët e vaksinuar plotësisht me AstraZeneca, Pfizer/BioNTech, Moderna ose Jonsson në SHBA, Australi, Zelandën e Re, Korenë e Jugut ose një vend të BE -së do të konsiderohen “plotësisht të vaksinuar” dhe të përjashtuar nga karantina kur të mbërrijnë në Angli nga një vend i listës së vendeve të origjinës.
Por njerëzit që janë vaksinuar plotësisht me të njëjtat vaksina në Afrikë ose Amerikën Latine, si dhe vende të tjera përfshirë Indinë, do të konsiderohen “jo plotësisht të vaksinuar” dhe do të detyrohen të karantinohen për 10 ditë pas mbërritjes nga një vend i listës së origjinës.
Në Evropë, ekziston zhgënjimi për refuzimin e Britanisë për të pranuar si njerëz plotësisht të vaksinuar ata që kanë pasur Covid ose një dozë të vetme të vaksinës. Njerëz të tillë konsiderohen plotësisht të vaksinuar në shumicën e vendeve të BE -së dhe janë në gjendje të udhëtojnë lirshëm nëpër bllok me një certifikatë dixhitale vaksinimi.
