Ministria e Shëndetësisë në Maqedoninë e Veriut lajmëron se gjatë 24 orëve të fundit janë regjistruar 227 raste të reja me Covid-19. Ndërkohë nga Instituti i Shëndetit Publik njoftojnë se janë shëruar 111 pacientë, duke e çuar numrin e përgjithshëm të të shëruarve në 186,322.
Betejën me Covid-19 e kanë humbur edhe 15 pacientë të tjerë, duke e çuar numrin e viktimave që nga fillimi i pandemisë në 7,051.
Ministri i Shëndetësisë, Venko Filipçe, tha se Maqedonia e Veriut e ka kaluar “valën e fortë” të koranavirusit dhe se për momentin nuk pritet ndonjë valë e re.
Ai përsëriti se vaksinimi mbetet mënyra e vetme për luftimin e pandemisë.
“Kjo valë ishte një valë e fortë dhe kishte një numër të madh të pacientëve të diagnostikuar dhe pacientëve që kishin nevojë për trajtim spitalor, por vetëm në qytetet ku vaksinimi ishte i ulët, ndërsa në qytetet ku ishte më i lartë, nuk kishte mbingarkesë në spitale. Tani, në të gjithë vendin vaksinimi është rritur dhe unë mendoj se nuk duhet të ketë një valë tjetër të fortë, por kjo nuk do të thotë që ne nuk duhet të jemi të kujdesshëm dhe të monitorojmë situatën”, tha Filipçe.
Deri të mërkurën, rreth 790,000 qytetarë të Maqedonisë së Veriut janë vaksinuar me së paku një dozë. Rreth 750,000 kanë marrë edhe dozën e dytë, ndërsa rreth 1,000 edhe dozën e tretë.
Shifrat e tilla, sipas ministrit të Shëndetësisë, Filipçe, tregojnë se 45 për qind e popullsisë së rritur në Maqedoninë e Veriut është e vaksinuar.
