Situata te skuadra e Specias në këto ditë mund të cilësohet pa frikë si kaotike. Fillimisht erdhi një dënim nga FIFA që i bllokoi merkaton. Më pas, nisi një valë e pazakontë infektimesh me 11 pozitivë ndaj COVID-19 në 3 ditë e me skuadrën që përfundoi në izolim, duke u lejuar që lojtarët të stërviten vetëm individualisht. Faji, sipas vetë zyrtarëve të klubit, është i dy lojtarëve që nuk pranojnë të vaksinohen.
Shpjegimet i ka dhënë Vinçenco Salini, mjeku i klubit të Serisë A në të cilin bën pjesë edhe mbrojtësi i përfaqësueses shqiptare, Ardian Ismajli. “Ne arritëm të bënim dozën e parë të vaksinës. Dy lojtarë nuk kanë dashur që të bëjnë vaksinën dhe u krijua një grup i vogël nga pikëpamja klinike. Për fat të gjithë djemtë janë mirë.
Të mos grumbullojmë ata që nuk pranojnë vaksinimin? Kjo u takon klubeve ta vendosin. Por gjithsesi bëhet fjalë për një përqindje të ulët. Kanë rezultuar pozitivë edhe lojtarë të vaksinuar pasi nuk kishim bërë ende dozën e dytë të vaksinës. Një nga këta lojtarët që refuzon vaksinat rezultoi pozitiv e më pas të tjerët u infektuan pasi kishin marrë dozën e parë prej pak ditësh. Jam i sigurt se te Specia nuk do të ketë probleme të tjera pasi të marrim dozën e dytë të vaksinës”, tha mjeku.
