“Ishte e dhimbshme të shikoje tentativën për grusht shteti nga kreu i Wagner në Rusi ,” tha sot udhëheqësi bjellorus Alexander Lukashenko në fjalimin e tij të parë që nga ngjarjet e fundjavës që kërcënuan udhëheqjen e aleatit të tij të ngushtë, presidentit rus Vladimir Putin. Në të njëjtën kohë, ai la dyshime për një tentativë rebelimi në Bjellorusi, të nxitur nga opozita në mërgim.
Gjatë një ceremonie në Minsk, Lukashenko theksoi: “Nuk do ta fsheh, ishte e dhimbshme të shikoja ngjarjet që ndodhën në jug të Rusisë. Jo vetëm për mua. Shumë nga bashkëqytetarët tanë e morën për zemër. Sepse ka vetëm një atdhe. Situata na iku, pastaj menduam se do të zgjidhej, por nuk ishte. Në këtë histori nuk ka heronj”.
“Dhe të arratisurit tanë ishin të zënë… Ata madje arritën të publikojnë apele dhe plane të rregullta – e kam fjalën për të arratisurit e opozitës bjelloruse që u larguan pas protestave të 2020. Ata janë gati të zbatojnë një skenar tjetër të një “kryengritjeje të armatosur””, tha ndër të tjera presidenti i Bjellorusisë.
Sipas agjencisë shtetërore bjelloruse të lajmeve BelTA, Lukashenko nuk e përmendi me emër kreun e “Wagner”, Yevgeny Prigozhin , as nuk dha informacion për vendndodhjen e tij pasi vendi i tij i ka ofruar azil.
Megjithatë, sipas informacioneve të cituara nga gazeta “Guardian “, kryengritësi i grupit Wagner thuhet se po udhëton sot me avion nga Rusia në Bjellorusi.
Lukashenko pohoi gjithashtu se ai kishte bërë përgatitje të ethshme ushtarake gjatë ngjarjeve të fundjavës. “Kam urdhëruar ushtrinë të jetë në gatishmëri të plotë luftarake”, tha ai.
Discussion about this post