Zona të ndryshme në Tiranë vuajnë mungesën e ujit të pijshëm. Autoritetet e justifikojnë mungesën e ujit me një defekt, por situata problematike është e shtrirë thuajse në të gjithë kryeqytetin. Ankesat e banorëve kanë rënë në vesh të shurdhër, ndërsa e vetmja zgjidhje për plotësimin e nevojave mbeten bidonat e ujit me pagesë.
Prej ditës së djeshme, banorë të disa lagjeve në kryeqytet, si Komuna e Parisit, Qyteti Studenti apo edhe një pjesë e zonës së Rrugës së Durrësit, vuajnë mungesën e ujit të pijshëm. Edhe pse UKT ka njoftuar për një defekt dhe se po punohet për riparimin e tij, gjatë ditës së sotme, në zonën e Qytetit Studenti uji ka ardhur për vetëm dy orë në orët e para të mëngjesit; aktualisht sërish nuk ka ujë.
Si shkak për mungesën e ujit cilësohen defektet teknike, por situata është e pazgjidhur prej vitesh, dhe sipas burimeve nga Ujësjellës-Kanalizime Tiranë, shkaku real është mungesa e infrastrukturës dhe mosmarrja e masave të duhura për përballimin e stinës së verës.
Në këtë situatë, banorët e rrugës “Jordan Misja” në Tiranë, përballen me një situatë alarmante që nga qershori i këtij viti, pasi janë pa ujë të pijshëm. Sipas tyre, çështja ka mbetur pa zgjidhje, pavarësisht se janë bërë dhjetëra ankesa dhe thirrje te Ujësjellësi i Tiranës (UKT) me drejtues Skerdi Drenova. Përgjigjja nga ana e UKT-së ka qenë gjithmonë e njëjtë, “do e raportojmë”, por asnjëherë nuk është marrë një masë konkrete për të zgjidhur problemin.
Në letrën publike më 15 gusht 2025, banorët apeluan për publikimin e situatës, duke kërkuar ndërhyrje të menjëhershme nga bashkia me kryetaren e komanduar Anuela Ristani dhe UKT e Skerdi Drenovës për të marrë masa urgjente. Ata shprehen se jeta e tyre është bërë e paqëndrueshme dhe se nuk mund të durojnë më pa ujë në vitin 2025, në kryeqytet. Ata shpresojnë që, përmes këtij publikimi, të zgjidhet një herë e mirë kjo çështje kaq serioze.
Por Skerdi Drenova dhe Anuela e Ristani janë të zënë duke numëruar milionat e tenderave, ndërsa kryeministri sa herë që ka krizë flet pë “reforma”, ku ndryshojnë emrat e zyrave, ndërsa drejtorët janë të njëjtit që vjedhin. tenderat.
Reforma e saposhpallur nga Rama quhet “Operatori Kombëtar për Ujin”, një strukturë e re kombëtare me fokus menaxhimin e të gjitha burimeve ujore në vend. Në realitet kjo sjell ndryshim: Do të centralizohen tenderat dhe vjedhja e tyre, por nuk do të shtohet asnjë pikë uji në rubineta.
gijotina.com/
Discussion about this post