Al Nassr është rikthyer te fitorja në Saudi Pro League, duke triumfuar në transfertën e Al Fateh, me rezultatin bindës 5-0.
Meritë për këtë sukses, pati dhe Cristiano Ronaldo, i cili zhvilloi një ndeshje fantastike, duke e ndihmuar ekipin e tij, me tre gola dhe një asistim për golin e Sadio Mane (autor, i dy golave).
Përsa i përket takimit, në imtësi, Al Nassr dominoi nga fillimi deri në fund, duke sulmuar pa limit ndaj një kundërshtari që sezonin e kaluar, arriti të ndalte në barazim kryeqytetasit, e drejtuar në atë kohë nga Rudi Garcia.
Pas sulmeve të shumta, miqtë gjetën golin e parë të takimit, në minutën e 27’, me autor senegalezin Sadio Mane, i cili finalizoi një aksion fantastik, së bashku me Brozovic dhe CR7, autor të asistimit.
Goli, motivoi akoma më shumë ekipin e Luis Castros, që kërkoi me ngulm, golin e dytë. Goli erdhi, pas 11 minutash, falë goditjes së saktë me kokë të legjendës portugeze, Cristiano Ronaldo.
Al Fateh, kërkoi të shkurtonte diferencat, vetëm falë ndonjë nisje në kundërsulm, megjithatë, Aymeric Laporte, në debutimin e tij me verdheblutë, ishte i pakalueshëm.
Në pjesën e dytë, muzika nuk ndryshoi, me Al Nassr që vazhdoi të sulmonte, duke çuar në ekstazë, tifozët e shumtë të saj, të ardhur nga Riadi.
Në të minutën e 55’, Brozovic shërbeu në mënyrë të përkryer, Ghareeb, me këtë të fundit, që e pati lojë fëmijësh që të asistonte CR7, për golin e tretë të mbrëmjes.
Atëherë kur dukej se “ra qetësia”, në këtë ndeshje, në minutën e 81’, Sadio Mane, realizoi me kokë, pas asistimit të talentit të Al Nassr, Ghareeb.
Në kohën shtesë, Cristiano Ronaldo, kompletoi ndeshjen fantastike të zhvilluar sonte, me tripletën personale, falë asistimit të Bushal.
Me këtë rezultat, Al Nassr, merr tre pikët e para në kampionat, duke lënë pas, startin negativ. Tashmë, CR7 me shokë, do provojnë të vazhdojnë me këtë ecuri, në mënyrë që të afrohen me kreun e rënditjes, pronë e skuadrave të Xhedas, Al Ittihad edhe Al Ahli, në këto momente të dyja me nga 9 pikë./m.b /gijotina.com
Discussion about this post